Shkup, 2 nëntor 2023 (MIA) - Taksa bullgare për transitin e gazit rus mund të rezultojë në rritje të çmimit të energjisë ruse për konsumatorët e fundit, që nga ana tjetër do të shkaktojë rritje të çmimit të ngrohjes dhe energjisë elektrike. 

Maqedonia e Veriut kërkon lirimin e kapaciteteve të gazit dhe se taksa nuk është e vlefshme sepse, siç tha dje kryeministri Dimitar Kovaçevski, është vendosur në mënyrë të padrejtë. Vendosja e kësaj tarife, sipas tij, do të shkaktojë rritje të çmimit të energjisë elektrike dhe ngrohjes.

"Prandaj kërkuam që të lirohet kapaciteti në mënyrë që Maqedonia e Veriut të mund të blejë gaz nga burime të tjera, të cilat nuk do të jenë ruse dhe kështu nuk do të ngarkohen me këtë taksë shtesë. Për momentin po zhvillohen bisedime si në nivel të Bashkimit Evropian ashtu edhe me Bullgarinë me ministrinë përkatëse që kjo të bëhet. Vitin e kaluar, së bashku me Komisionin Evropian dhe Bullgarinë, arritëm të lirojmë kapacitetin e prokurimit të gazit që nuk është ekskluzivisht në pronësi të Gazpromit dhe shpresoj se do të mund ta bëjmë edhe këtë", tha Kovaçevski, duke shtuar se së bashku me ministrin e Ekonomisë tashmë kanë reaguar në Komisionin Evropian.

Ministri i Ekonomisë, Kreshnik Bekteshi sonte deklaroi se deri në fund të nëntorit do të presim përgjigje për reagimin tonë dhe kërkesën tonë drejtuar Komisionit Evropian në lidhje me taksën e vendosur për transitin e gazit rus.

"Deri në fund të nëntorit do të presim përgjigje për reagimin tonë dhe kërkesën tonë drejtuar Komisionit Evropian në lidhje me taksën e vendosur për transitin e gazit rus nga Bullgaria. Kërkesa jonë është që të lirohen kapacitete shtesë të gazsjellësit që kemi me Bullgarinë, i cili është plotësisht i marrë me qira nga "Gazprom". Nëse nuk lëshohen sasitë e nevojshme për nevojat tona, ne do të kërkojmë kompensimin e dëmit nga Komisioni Evropian për mosrespektimin e direktivave të tyre dhe pse jo të kërkojmë drejtësi në një mosmarrëveshje ndërkombëtare me Komisionin Evropian dhe me Bulgargastrans", tha Ministri i Ekonomisë, Kreshnik Bekteshi sonte në emisionin Argument Plus në Televizionin 24.

Në anën tjetër, sipas Komisionit rregullator të energjetikës, nuk pritet korrigjim çmimi deri në fund të sezonit të ngrohjes.

"Nuk do të ketë korrigjim çmimesh deri në fund të sezonit të ngrohjes, pavarësisht nga taksa për gazin rus. Në tenderin e fundit për blerjen e gazit natyror çmimi është i zakonshëm dhe është diku në kuadër të bursës në Holandë, bursës më të madhe në Evropë. Nuk e dimë nëse në atë çmim përfshihen kosto shtesë apo jo, por çmimi është brenda intervalit të çmimeve të bursave evropiane. Besoj se në periudhën e ardhshme do të merren të gjitha masat, sepse Maqedonia nuk duhet të preket në asnjë mënyrë nga vendosja e kësaj takse sepse kjo taksë vlen ekskluzivisht për gazin rus dhe është e qartë se vendi nuk ka qenë objektivi, por të tjerët. vendet të cilat nuk e di se për çfarë arsye po sillen ashtu siç po sillen", tha të martën kryetari i KRE, Marko Bislimoski.

Reagime për vendosjen e taksës ndaj gazit rus nga Bullgaria kanë pasur edhe presidenti serb Aleksandar Vuçiq dhe ministri i jashtëm hungarez Peter Sijarto.

"Ky është një problem i madh për ne. Kjo do të sjellë një rritje drastike të çmimit të gazit me 100 euro shtesë për 1000 metër kub gaz. Kjo është një rritje e tmerrshme dhe do ta diskutojmë me palën bullgare. Dhe ky vendim nuk duhet të zbatohet për Serbinë, është përgjigjur presidenti serb Aleksandar Vuçiq.

Sipas Sijartos, taksat e reja bullgare janë të papranueshme dhe kërcënojnë solidaritetin evropian. 

Komisioni Evropian dje komunikoi se Bullgaria ka të drejtë të vendosë vetë se si do t'i përdorë të ardhurat nga mbledhja e tarifës.

"Tarifat që i paguan Bullgaria për transit të gazit rus drejt Serbisë, Hungarisë dhe Maqedonisë së Veriut janë një masë kombëtare dhe për këtë arsye është e drejtë e Bullgarisë të vendosë se ku do t'i destinojë këto të ardhura", deklaroi Mekfi, duke shtuar se në 11 pakot e masave që BE i prezantoi kundër Rusisë në fushën e sanksioneve energjetike parashikohen vetëm për naftën dhe qymyrin, por jo edhe për gazin.

Bullgaria më 13 tetor vendosi një tarifë për transitin e gazit rus përmes territorit të saj në shumën 10 euro për megavat në orë, nga e cila pret të ardhura vjetore prej 1,2 deri në 1,5 miliardë euro, fonde të cilat, siç paralajmëroi javën e kaluar nga Bullgari, kryeministri Nikolaj Denkov, ata mund të përfundojnë drejtpërdrejtë në buxhetin e BE-së.

Sofja pret që të ardhurat e para nga taksa e re të jenë në llogarinë e saj më 14 nëntor, por disa ekspertë bullgarë të energjisë janë skeptikë se vendi do të marrë fonde. Eksperti Kalojan Stojkov për "Euroaktiv" ka thënë se gazsjellësi nëpër të cilin transiton gazi, "vështirë se mund të cilësohet si rus, sepse lidhë disa burime të energjisë".

"Gazprom" ende nuk është prononcuar për taksën e re të energjisë dhe nuk dihet nëse ka ndërmend ta paguajë. Ministri bullgar i Financave Asen Vasilev javën e kaluar deklaroi se nëse "Gazprom" refuzon të paguajë tarifën, garancitë e tij financiare për kontratat në Bullgari do të konfiskohen dhe mund të përballet me konfiskimin e aseteve në vend. mb/

Foto: MIA