Shkup, 16 mars 2025 (MIA) – Presidentja Gordana Siljanovska Davkova sot i vizitoi spitalet në Shkup – “Shën Naumi i Ohrit”, “8 Shtatori” dhe Qendrën Klinike, ku e vizitoi një pjesë të të lënduarve në zjarrin e tmerrshëm të mëngjesit në diskotekën e Koçanit “Puls”, në të cilin sipas informacioneve të deritanishme humbën jetën 51 persona. 

Siljanovska Davkova në deklaratë për mediat para “Shën Naumi i Ohrit” shfaqi bindje se shumica që janë lënduar do të shpëtohen. 

 “Nuk mund të them asgjë, e tmerrshme. E di se ata janë njerëz të rinj të guximshëm. Besoj se shumica e tyre do të shpëtohen, mjekët janë këtu. Nuk mund ta kuptoj si mund të ndodhë kjo. Disa prej tyre edhe kontaktojnë, por kjo është”, tha Siljanovska Davkova. 

Ajo theksoi se e ndan dhimbjen me prindërit, duke shtuar se nuk mund të besojë si ka ndodhur kjo. 

 “Kjo është diçka që duhet të parashihet më parë, sepse nuk është hera e parë të përballemi me një gjë të tillë”, tha Siljanovska Davkova. 

Në pyetjen a e di se tashmë nuk ekziston Qendra e djegies, tha se nuk është njoftuar, se do të pyesë dhe se nga Akademia Ushtarake Mjekësore në Beograd i kanë ofruar ndihmë që persona të lënduar të dërgohen aty. fc/

Fotografia: Arkivi i MIA-s