Nju-Jork, 21 Mars 2026 (MIA) - Sekretari i përgjithshëm i KB-së, Antonio Guteresh, deklaroi se KB-ja bashkëpunon me Komitetin e paqes në Gaza, të themeluar nga presidenti amerikan, Donald Tramp, por e përshkroi rolin më të gjerë të këtij organi si një "projekt personal" të udhëheqësit të SHBA-së.

Në një intervistë për "Politiko", Guteresh theksoi se KB-ja mbështet qëllimin e Komitetit për financimin dhe zbatimin e një plani rindërtimi për Gazën, i cili përfshin rindërtimin e shtëpive dhe infrastrukturës palestineze.

"Ekziston një qëllim që është përcaktuar dhe miratuar nga Këshilli i Sigurimit, dhe ne po punojmë në mënyrë aktive me strukturat që Komiteti i paqes ka krijuar", tha Guteresh. Megjithatë, ai vuri në dyshim ambiciet më të gjera të organizatës, të cilën Tramp e themeloi në shtator të vitit 2025 si një alternativë ndaj asaj që ai e quajti institucione ndërkombëtare "të dështuara", duke e shpallur veten "president të përjetshëm të atij organi".

Anëtarësimi i përhershëm në Komitet kërkon një kontribut prej 1 miliard dollarësh.

Mbretëria e Bashkuar, Kanadaja, Franca dhe Gjermania "qëndruan mënjanë", ndërsa Rusia dhe Kina gjithashtu refuzuan anëtarësimin, duke e lënë organizatën kryesisht me vende të tjera, përfshirë Bjellorusinë dhe Azerbajxhanin.

Guteresh tha se, përveç planit të rindërtimit të Gazës, ai nuk shihte nevojë për Komitetin e Trampit.

"Çdo gjë tjetër tani është një projekt personal i presidentit Tramp, në të cilin ai ka kontroll të plotë mbi gjithçka", tha ai, duke shtuar se kjo nuk ishte një mënyrë efektive për të zgjidhur krizat ndërkombëtare dhe se e drejta ndërkombëtare dhe parimet e Kartës së KB-së duhet të respektohen.

Guteresh i bëri komentet gjatë një vizite në Bruksel me rastin e një takimi të Këshillit Evropian, ku një nga temat kryesore ishte situata në Iran.

Sekretari i përgjithshëm i KB-së theksoi gjithashtu se organizata mund të luante një rol në uljen e tensioneve në Ngushticën e Hormuzit.

Si shembull, ai përmendi Iniciativën e eksportit të drithërave nga Deti i Zi, të cilën KB e ndërmjetësoi në vitin 2022 për të mundësuar eksportin e ushqimit dhe plehrave ukrainase përmes një korridori humanitar. mb/

Foto: MIA