Berlin, 19 qershor 2023 (MIA) - Salman Ruzhdie, i cili ka qenë një nga autorët më të famshëm në botë që nga botimi i romanit të tij "Fëmijët e mesnatës" në vitin 1981, është fituesi i sivjetshëm i Çmimit për Paqe të Organizatës Gjermane të Botuesve dhe Librarive, transmetoi DPA.

Shkrimtari shtatëdhjetë e gjashtë vjeçar, i cili u plagos rëndë në një atentat vitin e kaluar, do ta marrë çmimin këtë vjeshtë në kishën e Shën Palit në Frankfurt, njoftoi sot Shoqata Gjermane e Botuesve dhe Librarive.

Autori britanik me origjinë indiane është shpërblyer për "shpirtin e tij të paepur, për afirmimin e jetës dhe për pasurimin e botës sonë me dashurinë e rrëfimit", thuhet në raportin e jurisë.

Vepra e tij, thuhet në raport, "demonstron forcën e përdorur nga regjimet shtypëse për të shkatërruar shoqëri të tëra, duke festuar gjithashtu frymën e pathyeshme të rezistencës së shfaqur nga qeniet njerëzore individuale".

Autori ka jetuar nën kërcënimin e jetës së tij që kur Ajatollah Homeini i Iranit lëshoi ​​një fetva kundër tij në vitin 1989 pas botimit të "Vargjeve Satanike", për të cilat kleriku tha se fyente Islamin. sa/

foto: Arkivi i MIA-s