Shkup, 2 shkurt 2026 (MIA) - Qeveria nuk është kundër rritjes së pagës minimale, por përkundrazi - qëllimi i saj strategjik është rritja e vazhdueshme e të gjitha pagave dhe përmirësimi i standardit të jetesës, por ekskluzivisht përmes zgjidhjeve sistemike, të dakorduara dhe ekonomikisht të qëndrueshme, tha zëvendësministri i Ekonomisë dhe Punës, Marjan Risteski.

 Në emisionin "Qëndrimi i Rajonit" (Stav na regionot)  në televizionin rajonal Newsmax Balkans, Risteski theksoi se Qeveria mbetet e përkushtuar ndaj dialogut social trepalësh në kuadër të Këshillit Ekonomik dhe Social (KES), si dhe se është e hapur për të diskutuar të gjitha çështjet në mënyrë transparente.

 "Për momentin paga minimale rregullohet me një zgjidhje sistemike të miratuar nga ana e KES dhe me mbështetjen e LSM, sipas një formule të miratuar disa vite më parë. Në atë kohë, kjo zgjidhje u paraqit si një fitore e madhe dhe vendosja përfundimtare e një zgjidhjeje sistemike për përcaktimin dhe rritjen e pagës minimale, pa ndërhyrje administrative dhe politike në krijimin e saj. Sot, i njëjti LSM ka një narrativë dhe qëndrim krejtësisht të ndryshëm ndaj kësaj marrëveshjeje, e cila më pas solli një rritje minimale në një kohë kur kishim inflacion jashtëzakonisht të lartë, dhe në një kohë të një ekonomie të stabilizuar dhe inflacionit prej 4 për qind, kërkojnë një rritje të pagës minimale jashtë kësaj formule ligjore me 50 për qind. Kjo sjellje e tyre, pa marrë parasysh një nga treguesit më të rëndësishëm ekonomikë, që është produktiviteti i punës, tregon se kërkesat e tyre janë pa çfarëdo qoftë logjikë ekonomike",  tha Risteski.

 Sipas tij, krahasimet e përgjithshme me vendet e tjera mund të japin një pamje të shtrembëruar të situatave, sepse çdo ekonomi është e ndryshme dhe ka karakteristikat e veta.

 "Ekonomia e Maqedonisë së Veriut ka një strukturë specifike ku mbi 90 për qind e kompanive ekzistuese janë ndërmarrje mikro, të vogla dhe të mesme, si dhe artizanë dhe tregtarë individualë që punësojnë shumicën e fuqisë punëtore dhe që do të preken më drejtpërdrejt nga këto çështje dhe vendime. Përveç kësaj, kemi edhe sektorë në shtet, kryesisht të lidhur me degët që kërkojnë shumë punë, siç janë industria e tekstilit dhe e lëkurës, ku paga minimale është më e përhapur dhe ku çdo rritje e pamatur mund të kërcënojë drejtpërdrejt mbijetesën e vendeve të punës", shtoi Risteski.

 "Vlerësoi edhe se nevojitet një qasje serioze në zgjidhjen e çështjeve ekonomike, bazuar në analiza dhe të dhëna me qëllim sjelljen e zgjidhjeve sistemike që duhet të rezultojnë nga një marrëveshje brenda kornizës së KES-it.

"Si Qeveri, mbetemi të përkushtuar për zbatimin e politikave që forcojnë ekonominë në shtet dhe rrisin standardin e jetesës, por kjo nuk bëhet me zgjidhje ad-hok dhe duke marrë vendime administrative-politike. Paga minimale duhet të rritet në mënyrë sistematike, të qëndrueshme dhe në kuadër të realiteteve ekonomike", theksoi zëvendësministri Risteski. 

 Foto: Ministria e Ekonomisë dhe Punës