Shkup, 26 dhjetor 2024 (MIA) – Ne si shumicë parlamentare mendojmë se duhet të ketë vullnet politik dhe marrëveshje politike për atë se kur do të fillojë të zbatohet procedura për ndryshimet kushtetuese, deklaroi në brifingun e sotëm me gazetarët kryetari i Kuvendit, Afrim Gashi.

“Procedura për ndryshime kushtetuese është e përcaktuar me Kushtetutë dhe Rregulloren e Punës. Kushdo që plotëson kushtet mund të ngrit nismë. Por ne si shumicë parlamentare mendojmë se duhet të ketë vullnet politik dhe marrëveshje politike se kur do të fillojë të zbatohet procedura. Ju e dini se ndryshimet kushtetuese ndodhin kur dy të tretat e Kuvendit tonë e votojnë atë dhe kur të jemi të sigurt se do të pranohet nga shumica e deputetëve në Kuvendin tonë, atëherë do të fillojmë procedurën. Në një rast tjetër nuk mund të ndalojmë askënd, por mendojmë se nuk është mirë të eksperimentojmë me veprime të tilla”, tha Gashi.

I pyetur nëse dështon premtimi parazgjedhor i VLEN-it për ndryshime kushtetuese deri në Vitin e Ri, Gashi u përgjigj se nuk i kujtohet nëse në programin e VLEN-it ka shkruar një gjë e tillë. 

“Nuk më kujtohet se kjo ishte shkruar në program. Sigurisht që kishte deklarata të tilla. Ju e dini që është çështje komplekse dhe nuk varet nga një segment politik, duhet të votojnë dy të tretat e Kuvendit. Siç e dini, pas tij qëndron Koalicioni VLEN dhe të gjithë deputetët dhe nëse do të ishin në rendin e ditës do t'i votonim sot. Por ne mendojmë se bashkërisht duhet të pajtohemi kur është më e mira për shtetin dhe për të gjithë qytetarët. Ne po bëjmë të gjitha përpjekjet si shumicë parlamentare që të miratojmë ndryshimet kushtetuese kur është më e mira për vendin tonë, kur ka marrëveshje politike për këtë dhe kur jemi të bindur se kemi parashikueshmëri në proces. Kjo do të thotë se nuk do të kemi veto tjetër për tre muaj, për gjashtë muaj etj”., tha ai.

Gashi potencoi se po bën përpjekje që aq sa mundet të distancohet nga agjendat politike të partive politike, duke u përgjigjur në pyetjen sa vihet në pikëpyetje pjesëmarrja e VLEN-it në Qeveri pasi më parë kryetari i Aleancës për Shqipëtarët, Arben Taravari tha se partnerët e koalicionit nga Koalicioni duhet të ulen dhe të bisedojnë për këtë çështje. 

“E kam përmendur disa herë, po e përsëris, përpiqem të distancohem sa më shumë që të mundem nga agjendat politike të partive politike, përfshirë edhe nga Koalicioni im prej nga vij dhe i përkas. Pra, nuk do të komentoja deklarata të tilla politike. Përpiqem ta kryej detyrën time me ndërgjegje, sipas ligjit dhe kushtetutës. Pra, në atë cilësi, sa herë që të ketë një nismë, do ta nis dhe do ta vendos në rend dite. Pres që të ketë sukses kur të ketë një marrëveshje politike dhe kushte për zbatimin e saj”, deklaroi Gashi. fc/

Fotografia: Arkivi i MIA-s