Shkup, 4 janar 2025 (MIA) - Dokumentet elektronike të shtypura do të kenë të njëjtën vlefshmëri si dokumenti origjinal. Kjo është bërë e mundur me ndryshimet në Ligjin për Dokumentet Elektronike të miratuara nga Kuvendi.

"Në Kuvend shumica votoi ndryshimin e Ligjit për Dokumentet Elektronike. Them dy nene janë, një ndryshim shumë i vogël, por mendoj se do të thotë shumë. Dhe kjo është se, tani e tutje, dokumentet e nxjerra elektronike nga portali apo çdo portal tjetër shtetëror, të cilat janë tërësisht elektronike, do të mund t'i printoni dhe t'i përdorni njësoj si një dokument origjinal. Nuk do të keni nevojë të dilni për të printuar", deklaroi ministri i Transformimit Dixhital Stefan Andonovski duke qenë mysafir mbrëmë në emisionin “Pro apo kundër” në televizionin Alfa.

Sipas Andonovskit, me ndryshimet e këtij ligji do të lehtësohet nxjerrja e dokumenteve dhe në vend që të shkojnë në sportele, qytetarët do t'i marrin shërbimet në pajisjet e tyre celulare.

"Fatkeqësisht, deri tani kur keni nxjerrë një shërbim nga portali, edhe pse është firmosur me një kod QR dhe një firmë elektronike dhe e keni bashkangjitur në një institucion si dokument, do t'ju thuhet se dokumenti nuk është origjinal por kopje. Me ndryshimet në ligj, ky dokument elektronik i printuar do të ketë të njëjtën vlefshmëri sikur të ishte me vulë të rregullt blu, kështu që mund të përdoret plotësisht kudo", theksoi Andonovski.

Ai bëri të ditur se do të ketë mbikëqyrje inspektuese, e cila do të reagojë sapo të raportojnë qytetarët, nëse ndonjë institucion nuk pranon dokumentet e tyre elektronike të printuara.

"Ndryshimi i këtij ligji na mundëson që të kryejmë edhe inspektimin nga Ministria, që do të thotë se ne fillimisht përgatisim një udhëzim parandalues, të cilin do t'ua dërgojmë të gjitha institucioneve, që ata të dinë se si funksionon procesi, të ndërgjegjësohen. Pastaj, kur qytetarët të raportojnë, kur të vërejmë se nuk e respektojnë ligjin, nëse ka të tillë, do të kemi hapësirë ​​që të shqiptojmë sanksione penale për ato institucione që nuk do t'i pranojnë këto dokumente elektronike", sqaron Andonovski. sa/

Foto: Ministria e Transformimit Digjital