Shkup, 30 shtator 2024 (MIA) - Ministri i Çështjeve Evropiane,  Orhan Murtezani, sot u takua me ambasadoren e Kroacisë në Maqedoninë e Veriut, Nives Tiganj.

Në takim, siç informon Ministria e Çështjeve Evropoiane, ata riafirmuan miqësinë e gjatë dhe marrëdhëniet e ngushta mes dy vendeve, poashtu shqyrtuan mundësitë e ardhshme për bashkëpunim dy palësh.

"Të dyja palët theksuan rëndësinë e thellimit të partneritetit, veçanërisht në kuadër të procesit të integrimit evropian të Maqedonisë së Veriut në Bashkimin Evropian", thuhet në kumtesë.

Ministri Murtezani nënvizoi rolin e Kroacisë si partner kyç në zhvillimin e projekteve të përbashkëta dypalëshe, me theks të veçantë në negociatat e aderimit. Ai iu referua nxitjes së bashkëpunimit nëpërmjet mekanizmave tashmë të krijuar si  Twining dhe TAIEX dhe vuri në dukje se Kroacia mbetet partneri ynë më i madh në projektet  Twining, përkatësisht në fusha të tilla si sundimi i ligjit, ndryshimet klimatike, mjedisi jetësorë dhe siguria e aviacionit.

"Murtezani dhe Tiganj diskutuan modalitetet për formalizimin e bashkëpunimit të thellë dypalësh, përmes asistencës teknike dhe të ekspertëve, e cila do të sigurojë një dialog të strukturuar dhe të vazhdueshëm me institucionet kroate, duke patur parasyshë përvojën e suksesshme integruese të Kroacisë si vendi i fundit anëtar i Bashkimit Evropian", qëndron në kumtesë.

Nga Ministria e Çështjeve Evropiane theksojnë se në kuadër të zgjerimit të bashkëpunimit, pranimi i Maqedonisë së Veriut në INTERREG Adrion, INTERREG Euro-Med, URBACT IV dhe INTERREG Europe hap mundësi të reja për bashkëpunimin trans-rajonal.  Këto programe ofrojnë një gamë të gjërë angazhimi për pjesëmarrësit nga institucionet nacionale, organizatat joqeveritare, sektori i biznesit dhe institucionet arsimore, thuhet në kumtesë. fc/

Fotografia: Ministria e Çështjeve Evropiane