Shkup, 4 korrik 2024 (MIA) - Zëvendëskryeministri i parë dhe ministër i Mjedisit Jetësor dhe Planifikimit Hapësinor, Izet Mexhiti takoi ambasadorin e Republikës së Francës në vend, Sirill Baumgartner, kumtuan nga MMJPH.

Ministri Mexhiti falënderoi ambasadorin Baumgartner për ndihmën të cilën vazhdimisht Maqedonia e Veriut e ka marrë nga Republika e Francës në rrugën e aderimit drejt Bashkimit Evropian.

Nga Ministria kumtojnë se ambasadori francez, Baumgartner ritheksoi se propozimi francez i cili qëndron në tryezë i rihap perspektivat europiane të Maqedonisë së Veriut dhe aspak nuk është në dëm të shtetit.

"Gjithashtu, në bisedë e sipër u fol edhe për projektet të cilat ministri Mexhiti ia shpalosi ambasadorit Baumgartner që si ministri e Mjedisit Jetësor dhe Planifikimit Hapësinor janë paraparë për t’u realizuar", thuhet në kumtesë.

Ambasadori francez e uroi ministrin Mexhiti për detyrat në Qeverinë e re si zëvendëskryeministër i parë dhe ministër, si dhe shprehu gatishmërinë që të bashkëpunojnë për të mirën e vendit dhe qytetarëve. bsh/

Foto: MMJPH