Makedonska Kamenicë, 31 tetor 2025 (MIA) - Kryetari i VMRO-DPMNE-së dhe kryeministër Hristijan Mickoski, duke folur sonte në një tubim në Makedonska Kamenicë, u bëri thirrje qytetarëve të dalin masivisht në votim të dielën, në raundin e dytë të zgjedhjeve lokale, duke theksuar se çdo votë është e rëndësishme dhe se të qëndrosh në shtëpi do të thotë të lejosh dikë tjetër të vendosë për të ardhmen.

Mickoski vuri në dukje se koalicioni i udhëhequr nga VMRO-DPMNE arriti një rezultat historik në raundin e parë të zgjedhjeve, duke fituar shumicën e listave të këshilltarëve në 58 komuna dhe në Qytetin e Shkupit - gjithsej 59 komuna. Sipas tij, 33 kryetarë të komunave janë zgjedhur tashmë dhe 26 kandidatë të tjerë nga koalicioni do të garojnë në raundin e dytë.

Ai falënderoi të gjithë qytetarët që dolën dhe votuan në raundin e parë dhe u bëri thirrje të gjithë atyre që ende hezitojnë të ushtrojnë të drejtën e tyre për të votuar të dielën.

"Shohim se ka qytetarë tanë që nuk kanë ardhur në Maqedoni me vite, por vijnë nga vendet e Evropës Perëndimore për të votuar në vende si Bërvenica dhe Kërçova. Në të njëjtën kohë, ka edhe bashkëqytetarë tanë që qëndrojnë në shtëpi duke menduar se do të dërgojnë një mesazh ose do të revoltohen. Por duke vepruar kështu, ju vetëm po lejoni që dikush tjetër të vendosë për të ardhmen tuaj", tha Mickoski, duke shtuar se mesazhi i tij është që të gjithë të dalin masivisht dhe të votojnë për numrin 9 - kandidatin e VMRO-DPMNE-së, Dimçe, për kryetar të Makedonska Kamenicës.

Kryeministri theksoi se VMRO-DPMNE, si parti dhe koalicion, lufton në mënyrë të barabartë për çdo komunë dhe për çdo qytetar dhe, siç tha ai, këtë e kanë treguar në 16 muajt e kaluar të qeverisjes. sa/

Foto: MIA