Shkup, 8 shkurt 2026 (MIA) - Kryeministri Hristijan Mickoski sot informoi se Qeveria është e gatshme të ulet në tryezë për të përgatitur marrëveshje të re kolektive të përgjithshme, duke pasur parasysh se ajo aktuale tashmë ka skaduar.

Siç deklaroi ai në konferencën për shtyp pas arritjes së marrëveshjes për rritjen e pagave në administratë, ky është viti kur Qeveria dëshiron të vendosë rend dhe disiplinë në vend dhe kjo ndër të tjera, tha ai, përfshin edhe zgjidhjen e kësaj çështje.

Lidhur me konsolidimin fiskal, Mickoski theksoi se kjo Qeveri trashëgoi një situatë kaotike. Nëse në vitin kur mori pushtetin, deficiti buxhetor ishte mbi 4.5 për qind të BPV-së dhe vitin e kaluar ishte nën 4 për qind, në vitin 2026 pritet të konsolidohet në 3.5 për qind.

"Kemi një sjellje të përgjegjshme dhe kujdes për thesarin e shtetit. Do të vazhdojmë kështu. Dikush mund ta komentojë këtë si sjellje kursimtare, por ne duhet të sillemi kështu sepse barra dhe të gjitha detyrimet që kemi trashëguar, borxhet që duhet t'i servisojmë, janë historikisht të mëdha. Këtë vit duhet të kthejmë ose të rishkruajmë 2.5 miliardë euro, vitin tjetër ndoshta pak më shumë sepse do të na transferohen nga viti 2028 kur do të kemi qeveri teknike. Kemi një barrë vërtet të madhe, por kjo është ajo që është, nuk do të ankohemi dhe ta përsërisim në çdo konferencë për shtyp. Jemi këtu për të luftuar, për të treguar karakter dhe mendoj se me hapa kaq të guximshëm tregojmë karakter. Kjo është ajo për të cilën zotohemi si qeveri dhe do ta përmbushim. Lidhur me Marrëveshjen e përgjithshme kolektive, ajo ka skaduar dhe jemi gati të ulemi dhe t'i vendosim të gjitha këto në një kornizë, në mënyrë që të mos kemi 4-5 dokumente në bazë të të cilave do të referohemi kur llogarisim pagat ose procese gjyqësore të mundshme. Ky është viti kur duam të vendosim rend dhe disiplinë në vend. Ndër të tjera, po mendojmë për këtë lloj konsolidimi, për marrëdhëniet me kolegët tanë, për konsolidimin fiskal, për uljen e ekonomisë gri...", theksoi kryeministri Mickoski.

Foto: Qeveria