Shkup, 5 qershor 2025 (MIA) - Jetojmë në një kohë kur krizat ekologjike nuk janë më kërcënime abstrakte, por një realitet i përditshëm me ndikim të drejtpërdrejtë në shëndetin publik, sigurinë ushqimore, ekonominë dhe mirëqenien sociale. Rritja e ndotjes në zonat urbane, humbja e biodiversitetit, presioni mbi burimet natyrore dhe pasiguria klimatike kërkojnë një përgjigje të koordinuar, të bazuar në prova dhe një vizion afatgjatë, tha sot Ministri i Mjedisit Jetësor dhe Planifikimit Hapësinor Izet Mexhiti, duke hapur konferencën e parë "Së bashku për një mjedis të qëndrueshëm jetësor".

 Siç theksoi Mexhiti, qëllimi i konferencës është të inkurajojë dialogun dhe koordinimin midis aktorëve kryesorë: institucioneve publike, partnerëve ndërkombëtarë, komunitetit shkencor, industrisë, sektorit joqeveritar dhe qytetarëve.

"Qëllimi është i qartë, të ndërtojmë një qasje të integruar dhe të qëndrueshme ndaj mjedisit jetësor, duke e trajtuar atë si bazë të zhvillimit kombëtar. Synojmë të ndërtojmë një mekanizëm të qëndrueshëm të menaxhimit mjedisor që do të matë progresin, do të identifikojë zbrazëtirat dhe do të riformulojë politikat për menaxhimin e burimeve natyrore", theksoi ministri.

 Konferenca përfshin dy panel diskutime, një mbi mbrojtjen dhe menaxhimin e burimeve natyrore, dhe i dyti për menaxhimin e qëndrueshëm të mbeturinave dhe kalimin në një ekonomi cirkulare. Siç vuri në dukje Mexhiti, kjo konferencë do të organizohet çdo vit më 5 qershor, me rastin e Ditës Botërore të Mjedisit Jetësor.

Ministri Mexhiti, pas fjalimit të tij, shpalli gjithashtu zyrtarisht të nisur fushatën kombëtare "E Ardhmja e Qëndrueshme". 

Фото: МИА