Qafë Thanë, 22 mars 2023 (MIA) - Punët ndërtimore për rikonstruimin dhe zgjerimin   e aksit rrugor në vendkalimin kufitar Qafë Thanë, në kufirin  Shqipëri-Maqedonia e Veriut, afër Strugës, deri në qytetin e Elbasanit po zhvillohen me një dinamikë të përshpejtuar, publikoi kryeminsitri shqiptar Edi Rama në Fejsbuk.  

Ai ka shpërndarë fotografi nga ky kantier ku po vazhdojnë punët për ndërtimin e nënkalimeve dhe një urë. 

"Ky aks do të shkurtojë ndjeshëm distancat dhe do të kthehet në një rrugë interurbane me katër korsi, si pjesë e korridorit të 8-të, tanimë i përfshirë në rrjetin evropian.  Rruga Elbasan-Qafë Thanë është e kategorisë B, me dy korsi në çdo anë, me ndarëse dhe të gjitha parametrat e rrugës"k shkruar Rama.
 
Projekti, i cili do të realizohet në disa faza, parashikon ndërhyrjen e rrugës ekzistuese të ndërtuar para dy dekadave, por edhe ndërtimin e segmenteve të reja në varësi të terrenit.
 
Punimet fillimisht po zhvillohen në 5.3 kilometrat e para të kësaj rruge, aksi Xibrakë-Mirakë, i cila do të jetë pjesërisht në terren të ri dhe përkohësisht përdotret  rruga e vjetër.
 
Për këtë janë planifikuar mjete prej 25 milionë euro. Krahas kësaj do të bëhet edhe një studim për ndërtimin e një bajpasi në Elbasan me qëllim që të mos hyhet në qytet.
 
Me realizimin e projektit lehtësohet trafiku dhe shkurtohet koha e udhëtimit, si në drejtim të Maqedonisë së Veriut, ashtu edhe në drejtim të Korçës, me rritjen e shpejtësisë maksimale të lejuar deri në 110 kilometra në orë.
 
Ky aks i rëndësishëm pritet të përfundojë brenda dy viteve dhe nëse deri më sot nga Qafë Thana deri në Elbasan nevojiten  1 orë e 30 minuta, pas ndërtimit, kjo distancë do të kalohet për vetëm 35 minuta. Gjatësia e përgjithshme e aksit është 48.12 kilometra, është pjesë e korridorit 8 dhe nyja kryesore e lidhjes tokësore me Maqedoninë dhe Greqinë dhe viteve të fundit frekuenca është rritur disa herë. ar/