Athinë, 16 tetor 2024 (MIA) – Vazhdim i takimeve joformale, por me përbërje të zgjeruar, si dhe takim në Qipro i dy liderëve për të shqyrtuar mundësinë e hapjes së vendkalimeve të reja, ndër të tjera janë dakorduar presidenti i Qipros. Nikos Hristodulidis dhe lideri i turqve qipriotë Ersin Tatar në darkën joformale të mbrëmshme në Nju Jork, të organizuar nga sekretari i përgjithshëm i OKB-së, Antonio Guteresh, njoftoi korrespondentja e MIA-s nga Athina.

Nga kabineti i Sekretarit të Përgjithshëm kumtuan se Guteresh i "inkurajoi liderët të konsiderojnë se si të kapërcejnë hendekun në pozicionet e tyre dhe të rindërtojnë besimin për të mundësuar lëvizjen që çon në një zgjidhje".

"Liderët ranë dakord që në të ardhmen e afërt të zhvillojnë një takim jozyrtar në një format më të gjerë, nën patronazhin e Sekretarit të Përgjithshëm, për të diskutuar për rrugën përpara. Ata ranë dakord gjithashtu të takohen në Qipro për të shqyrtuar mundësinë e hapjes së vendkalimeve të reja. Sekretari i Përgjithshëm theksoi angazhimin e vazhdueshëm të vendosur të Kombeve të Bashkuara për një zgjidhje paqësore të çështjes së Qipros, për të mirën e të gjithë qipriotëve dhe brezave të ardhshëm", kumtuan nga OKB.

Presidenti i Qipros Nikos Hristodoulidis tha pas takimit se nuk ka dëgjuar asgjë të re nga Tatari, nuk ka pasur përparim në çështjet thelbësore, por shprehu kënaqësinë për iniciativën e Sekretarit të Përgjithshëm dhe shpreson se do të ketë një marrëdhënie pozitive në të ardhmen në drejtim të rifillimit të bisedimeve për çështjen e Qipros.

Presidenti i Republikës së vetëshpallur Turke të Qipros Veriore, Ersin Tatar tha se në darkën joformale u diskutuan shumë çështje dhe se ai shpjegoi pasojat e vazhdimit të embargos dhe izolimit dhe theksoi se “nuk do të ketë kthim në negociatat zyrtare derisa të konfirmohet barazia sovrane dhe statusi i barabartë ndërkombëtar”.

Ai shpjegoi se është rënë dakord që takimi i radhës me Sekretarin e Përgjithshëm të Kombeve të Bashkuara, Antonio Guteresh, të bëhet me pjesëmarrjen e Turqisë dhe Greqisë, si vende garantuese.

Negociatat për çështjen e Qipros u pezulluan në korrik 2017 kur nuk u arrit asnjë zgjidhje në Kran Montana. ls/