Berlin, 25 prill 2024 (MIA) - Kryeministri i Kosovës, Albin Kurti sot në Berlin deklaroi se qëllimi i Kosovës është anëtarësimi në organizatat ndërkombëtare, BE dhe NATO.

Ai gjatë vizitës së tij në "Fondacionin Bertelsman", tha se qëllimi është përmirësimi i marrëdhënieve të Kosovës me Gjermaninë dhe shtetet demokratike evropiane.

Kurti, duke kujtuar historinë e viteve të 90-ta të shekullit të kaluar dhe rrugën e shumë vendeve drejt integrimeve euroatlantike dhe zgjerimit të BE-së, NATO-s dhe Këshillit të Evropës (KE), nënvizoi se qëllimi i Kosovës është anëtarësimi në këto organizata.

Ai po ashtu theksoi rëndësinë historike dhe “dinamikën e marrëdhënieve” të Kosovës me Gjermaninë dhe shtetet demokratike evropiane.

“Ne e bëmë hapin e parë në vitin 2008, kur Kosova shpalli pavarësinë dhe kur u njohëm nga shumica e demokracive në Evropë”, tha ai. Siç tha, “hapi i dytë i referohet bashkimit me institucionet që janë shtyllat e një Evrope demokratike”.

"Ne duam t'i bashkohemi NATO-s si një ombrellë sigurie për kontinentin tonë. Ne duam t'i bashkohemi BE-së si projekti dhe procesi më i rëndësishëm i paqes dhe prosperitetit, theksoi kryeministri i Kosovës.

Ai e theksoi rëndësinë e anëtarësimit të Kosovës në Këshillin e BE-së.

“Hapi i parë që duhet të bëjmë tani është t'i bashkohemi klubit të parë të demokracive evropiane, i krijuar pikërisht këtë muaj 75 vjet më parë në Londër – Këshilli i Evropës”, ​​tha Kurti.

Ai shtoi se Qeveria e Kosovës është e përkushtuar që të respektojë vlerat e përbashkëta, të drejtat e njeriut, sundimin e ligjit dhe demokracinë.

Kurti u bëri thirrje autoriteteve gjermane që të vazhdojnë ta mbështesin Kosovën në fazën finale të votimit dhe arritjen e anëtarësimit të plotë në atë organizatë, kumtoi Qeveria e Kosovës.

Ai tha se pranimi i Kosovës si anëtare e 47-të e Këshillit të Evropës në 75 vjetorin e tij është “progres historik, për Kosovën dhe qytetarët e saj, për rajonin dhe për të gjithë Këshillin”. Siç theksoi, nga kjo do të përfitojnë të gjithë qytetarët, veçanërisht minoritetet në Kosovë. ls/

Foto: Arkiv