Shkup, 14 shtator 2025 (MIA) - Pas afatit për dorëzimin e listave të kandidatëve për kryetarë të komunave   dhe këshilla të komunave dhe Qytetit të Shkupit, në 80 komuna dhe Qytetin e Shkupit, deri te komisionet zgjedhore komunale janë dorëzuar gjithsej 312 lista kandidatësh për kryetarë të komunave  dhe 575 lista të kandidatëve për këshilltarë të komunave dhe Qytetit të Shkupit, informojnë nga Komisioni Shtetëror i Zgjedhjeve (KSHZ). Në këtë numër janë përfshirë listat e kandidatëve nga partitë politike dhe listat e dorëzuara nga një grup të votuesve.

 Numri më i madh i listave të kandidatëve për kryetarë të komunave dhe këshilla është dorëzuar për Qytetin e Shkupit, përkatësisht gjithsej 18 lista të kandidatëve për kryetar të Qytetit të Shkupit dhe 20 lista të kandidatëve për anëtarë të Këshillit të Qytetit të Shkupit.

"Sipas Afatit për Zgjedhjet Lokale të vitit 2025, KKZ-ja paraqet një kërkesë te institucionet që posedojnë të dhënat për përmbushjen e kushteve menjëherë pas marrjes së listës, pra jo më vonë se 14 shtatori. Pasi të përfundojë verifikimi i përmbushjes së kushteve dhe të përfundojë procesi i eliminimit të çdo parregullsie ose lëshimi në listat e kandidatëve, komisionet zgjedhore komunale i dorëzojnë listat e konfirmuara te Komisioni Shtetëror i Zgjedhjeve për të përcaktuar renditjen në listën e vetme të kandidatëve, menjëherë pas konfirmimit të listës, gjegjësisht më së voni më 20 shtator të vitit 2025", shpjegon KSHZ-ja.

 Pas përfundimit të procesit të kontrollit të dokumentacionit dhe përmbushjes së kushteve ligjore dhe konfirmimit nga KKZ-ja, KSHZ-ja do të publikojë të gjitha listat e konfirmuara sipas komunave që do të marrin pjesë në zgjedhje.

 Foto: Arkivi i MIA-s