Shkup, 31 mars 2023 (MIA) - Ministria e Drejtësisë e Republikës së Maqedonisë së Veriut dhe Grupi Punues për Kodin Civil, mbështetur nga projekti rajonal “Reformat Ligjore për Zhvillim Ekonomik në Ballkanin Perëndimor” financuar nga Ministria Federale Gjermane për Bashkëpunim dhe Zhvillim Ekonomik  dhe zbatuar nga GIZ, organizojnë Konferencën dyditore për Ligjin për të drejtën familjare dhe të drejtën trashëgimore më 31 mars dhe 1 prill në Ohër.

"Miratimi i Ligjit Civil paraqet një veprim shumë serioz jo vetëm në fushën e së drejtës civile, por edhe në kuadër të sistemit juridik të vendit tonë. Me përpunimin e Kodit Civil do të tejkalohen zbrazëtirat ligjore, paqartësitë dhe kontradiktat që ekzistojnë në ligjet që rregullojnë këtë çështje dhe do të sigurohet ajo që është problemi më i madh në shtetin e së drejtës në vend, që është siguria juridike”, theksoi zëvendësministrja e Drejtësisë, Viktoria Avramovska Madiq në hapjen e konferencës.

Jana Shuman, drejtuese e ekipit në GIZ theksoi se me miratimin e Kodit të ri Civil, Republika e Maqedonisë së Veriut do t'i bashkohet vendeve evropiane që kanë Ligje Civile dhe do të jetë vendi i parë në rajonin e Ballkanit Perëndimor, duke finalizuar procesin e kodifikimit civil.

"Miratimi do të sigurojë siguri më të madhe juridike dhe besim nga qytetarët dhe nga pjesëmarrësit në transaksionet ligjore dhe investimet. Bashkëpunimi gjerman do të vazhdojë të krijojë platforma në të cilat sistemet ligjore fqinje mund të shkëmbejnë perspektivat dhe praktikat më të mira”, tha Shuman.

Anëtarët e komunitetit akademik, gjyqtarët, noterët, avokatët dhe juristët e shquar do të debatojnë lidhur me reformat më domethënëse të propozuara me projekt-kodin gjatë konferencës. fc/

Fotografia: Ministria e Drejtësisë