Shkup, 20 gusht 2025 (MIA) - Sfidat rrjedhëse me të cilat përballen personat me invaliditet, asistencë personale dhe personat që kujdesen për to në Maqedoni ishin temë e diskutimit në takimin e djeshëm që u mbajt në zyrën e presidentes Gordana Siljanovska Davkova, informon Koalicioni "Ndryshojmë".

Në fokus të takimeve, siç citohet, ishte çështja e pazgjidhur për vonesën dhe kompensimin e papaguar për asistencë personale dhe personat që kujdesen për to në muajt maj, qershor dhe korrik të vitit 2025.

"Pjesëmarrësit në diskutim - duke përfshirë personat me invaliditet, asistencë personale, personat të cilët kujdesen për to dhe përfaqësuesit e Koalicionit "Ndryshojmë", shprehën brenga serioze në lidhje me: pagesën e parregullt dhe të vonuar të pagave, dështimet në ofrimin dhe koordinimin e shërbimeve, trajtimin e papërshtatshëm dhe shpërfillës të asistentëve personalë dhe kujdestarëve nga përfaqësuesit institucionalë, si dhe strukturat e paqarta dhe çështjet e pazgjidhura brenda sistemit aktual të shërbimeve mbështetëse", thuhet në kumtesë.

Grupi i fokusit ra dakord unanimisht t’i paraqesë Ministrisë së Politikës Sociale, Demografisë dhe Rinisë një letër zyrtare me shqetësimet dhe zgjidhjet e propozuara.

"Do të kërkojmë zyrtarisht një takim me ministrin Limani dhe zëvendësministrin Velkovski për të zgjidhur këto çështje urgjente. Kjo iniciativë përfaqëson një thirrje kolektive për më shumë llogaridhënie, transparencë dhe respekt për të drejtat e personave me aftësi të kufizuara dhe atyre që i mbështesin ata", thuhet në kumtesë. sa/

Foto: Koalicioni "Ndryshojmë"