Nju-Jork, 17 prill 2026 (MIA) - Mesatarisht të paktën 47 gra dhe vajza janë vrarë çdo ditë në luftën në Gaza, sipas të dhënave të publikuara sot nga agjencia e grave e KB-së, duke paralajmëruar se vrasjet kanë vazhduar gjashtë muaj pas vendosjes së një armëpushimi të brishtë.

Më shumë se 38,000 gra dhe vajza u vranë në Gaza midis tetorit 2023 dhe dhjetorit 2025, sipas një raporti nga agjencia e KB-së për gratë, e cila përqendrohet në barazinë gjinore.

"Gratë dhe vajzat kanë përbërë një përqindje shumë më të lartë të vdekjeve sesa është regjistruar në konfliktet e mëparshme në Gaza", u tha gazetarëve në Gjenevë Sofia Kaltorp, drejtuese e Departamentit të operacioneve humanitare të agjencisë.

"Ata ishin individë me jetë dhe ëndrra", shtoi ajo.

Agjencia shprehu shqetësim se vrasja e grave dhe vajzave vazhdoi pas armëpushimit të tetorit, megjithëse nuk e di saktësisht se sa u vranë për shkak të mungesës së të dhënave të gjeneruara sipas gjinisë.

Kjo agjenci e KB-së paralajmëron gjithashtu se rreth një milion gra dhe vajza janë të zhvendosura në Gaza.

"Për shkak të dëmeve të shumta në infrastrukturë, është pothuajse e pamundur të përmbushen nevojat themelore, siç është kujdesi shëndetësor për gratë dhe vajzat në Gaza", tha Kaltorp.

Të dhënat nga Organizata Botërore të Shëndetësisë tregojnë se më shumë se 500,000 gra nuk kanë qasje në shërbimet bazë, siç janë kujdesi para lindjes dhe pas lindjes, si dhe trajtimi për infeksionet seksualisht të transmetueshme.

Një armëpushim i tetorit i dha fund një lufte dyvjeçare me përmasa masive, por forcat izraelite ende kontrollojnë më shumë se gjysmën e Gazës, ndërsa Hamasi sundon rripin e ngushtë bregdetar të mbetur.

Mjekët vendas thanë se më shumë se 750 palestinezë janë vrarë që nga fillimi i armëpushimit, ndërsa militantët kanë vrarë katër ushtarë izraelitë.

Izraeli dhe Hamasi akuzojnë njëri-tjetrin për shkelje të armëpushimit.

Agjencia e KB-së për Fëmijët (UNICEF) tha sot se fëmijët vazhdojnë të vriten dhe plagosen me një shkallë alarmante në Gaza, me të paktën 214 vdekje të konfirmuara në gjashtë muajt e fundit. sa/

Foto: MIA arkivi