Tel Aviv, 30 mars 2025 (MIA) - Izraeli mbrëmë konfirmoi se nga vendet ndërmjetësuese ka marrë propozimin e ri për armëpushimin dhe lirimin e pengjeve dhe shtoi se ka dorëzuar kundërofertë, transmetoi "Tajms of Izrael".

Jerusalemi paraqiti kundërpropozimin e tij në koordinim të plotë me Shtetet e Bashkuara të Amerikës, shkruan "Tajms of Izrael".

Kumtesa izraelite vijon pas raporteve mediatike se Hamasi ka rënë dakord me një propozim egjiptian sipas të cilit do të lironte pesë pengje të gjalla në këmbim të një armëpushimi 50-ditor në Gaza.

Ky armëpushim do të hyjë në fuqi në festën myslimane të Fitër Bajramit, sot ose nesër, thonë mediat.

Siç raportohet nga disa media, ky propozim nuk i plotëson kërkesat e Izraelit, i cili këmbënguli për lirimin e 10 ose 11 pengjeve të gjalla me qëllim rivendosjen e armëpushimit, bazuar në një propozim të mëparshëm të të dërguarit amerikan për Lindjen e Mesme, Stiv Vitkof.

Një zyrtar egjiptian i paidentifikuar tha se propozimi i armëpushimit përfshinte kthimin e trupave të pengjeve të vrarë të Hamasit, por nuk specifikoi numrin e tyre. sa/

Foto: EPA