Shkup, 24 prill 2025 (MIA) - Kryetari i Kuvendit, Afrim Gashi, theksoi se pas ngjarjeve të ndryshme në kontekstin evropian dhe global, vërehet një moment i ri politik për rritjen e gatishmërisë së vendit për përshpejtimin e procesit të integrimit evropian.

"Sa i përket diplomacisë parlamentare, është me të vërtetë një prioritet për mua. Dua ta zhvillojmë si vend. Ky është një trend që po zhvillohet në demokracitë më të zhvilluara. Pikërisht për këtë arsye më është dashur të mbaj takime historike në Berlin, Paris, Stokholm, Bruksel, Parlamentin Evropian dhe selinë e NATO-s. Pas ngjarjeve në Ukrainë, luftës dhe zgjedhjeve presidenciale në Shtetet e Bashkuara të Amerikës, ka një kontekst të ri politik dhe vrull për rritjen e vullnetit që vendi ynë të përshpejtojë procesin e tij integrues", tha Gashi në brifingun e sotëm me gazetarët.

Kryeparlamentari thekson se shteti ka shumë miq të cilët duan të ndihmojnë dhe shpreson se do të tejkalohet pengesa, përkatësisht votimi i ndryshimeve kushtetuese.

"Pra, po, ne po punojmë në të gjitha nivelet dhe unë si kryetar i Kuvendit po i shfrytëzoj të gjitha mjetet dhe mundësitë për të zhvilluar këtë diplomaci parlamentare dhe në këtë kontekst po punojmë më së shumti për të shpjeguar situatën që kemi me pengesën më të madhe, që janë ndryshimet kushtetuese. Ne kemi shumë miq, ata duan të na ndihmojnë dhe sinqerisht shpresoj se më në fund do të arrijmë ta kalojmë edhe këtë pengesë", tha Gashi. sa/

Foto: Arkivi i MIA-s