Nju Jork, 19 shtator 2023 (MIA) - Grupi i shtatë vendeve më të zhvilluara industrialisht (G7) i bëri thirrje Kinës që të bëjë presion ndaj Rusisë për të ndaluar luftën në Ukrainë, u kumtua pas një takimi të ministrave të Punëve të Jashtme të G7 të mbajtur në margjinat e Asamblesë së Përgjithshme të Kombeve të Bashkuara në Nju Jork.

Në kumtesën e lëshuar nga Ministria e Punëve të Jashtme të Japonisë, e cila kryeson me G7, theksohet se anëtarët shpresonin se Kina do të insistonte në tërheqjen e menjëhershme, të plotë dhe të pakushtëzuar të trupave ruse nga Ukraina.

Kumtesa vjen përderisa drejtori i Zyrës së Komisionit të Punëve të Jashtme të Komitetit Qendror të Partisë Komuniste të Kinës dhe ministri i Punëve të Jashtme Vang Ji janë në një vizitë katër-ditore në Rusi, gjatë së cilës të dy vendet pritet të përmirësojnë marrëdhëniet politike.

Vendet anëtare të G7 mirëpritën gjithashtu pjesëmarrjen e Pekinit në takimin e udhëhequr nga Ukraina në Xheda dhe "e inkurajuan më tej Kinën të mbështesë një paqe të drejtë dhe të qëndrueshme, duke përfshirë dialogun e drejtpërdrejtë me Ukrainën", thuhet në kumtesën.

Në deklaratën e përbashkët të G7 nuk theksohet asnjë vend, por theksohet se anëtarët "përsëritën thirrjen e tyre ndaj palëve të treta që të ndërpresin çdo ndihmë për luftën e agresionit të Rusisë ose do të përballen me kosto të rënda". ls/

Foto: EPA