Shkup, 2 nëntor 2025 (MIA) - Në 32 komuna dhe në Qytetin e Shkupit sot votohet për kryetarë komunash, ndërsa në tre vendvotime në Shuto Orizare votohet edhe për këshilltarë.

Në raundin e dytë votohet për dy kandidatët të cilët në raundin e parë kanë marrë më së shumti vota, ndërsa për kryetar komune është zgjedhur kandidati i cili ka marrë numër më të madh të votave.

Sipas Kodit Zgjedhor, nëse edhe pas raundit të dytë për çfarëdo arsye nuk bëhet zgjedhja e kryetarit të komunës, komisioni zgjedhor në afat prej 15 ditësh nga përfundimi i zgjedhjeve e njofton Qeverinë. Pas marrjes së njoftimit Qeveria në afat prej 15 ditësh do ta emërojë një përfaqësues për kryerjen e punëve nga kompetenca e kryetarit të komunës.

Qeveria më së voni në afat prej 15 ditësh pas ditës së emërimit të përfaqësuesit e njofton kryetarin e Kuvendit për shpalljen e zgjedhjeve për kryetar komune.

Komisioni Shtetëror Zgjedhor rezultatet fillestare të zgjedhjeve të pranuara në mënyrë elektronike i publikon njëra pas tjetrës, ndërsa rezultatet në bazë të të dhënave nga procesverbalet e komisioneve komunale zgjedhore përkatësisht Komisioni Zgjedhor i qytetit të Shkupit në afat prej 12 orësh pas përfundimit të zgjedhjeve.

Rezultatet përfundimtare të zgjedhjeve KSHZ i publikon menjëherë, ndërsa më së voni në afat prej 24 orëve nga dita e përfundimit të tyre. sa/

FOTO: MIA Arkivi