Prishtinë, 21 prill 2024 (MIA) - Në katër komuna në veri të Kosovës, të populluara me popullatë shumicë serbe, sot mbahet votimi për shkarkimin e kryetarëve të komunave, si kusht për mbajtje të zgjedhjeve të reja lokale në ato komuna, pasi që zgjedhjet e vitit të kaluar serbët i bojkotuan, lajmëroi korrespondenti i MIA-s nga Prishtina.

Zëdhënësi i Komisionit qendror zgjedhor të Kosovës, Valmir Elezi, në konferencë për shtyp sot në mëngjes kumtoi se janë hapur të gjitha qendrat e votimit në komunat Leposaviq, veri të Mitrovicës, Zubin Potok dhe Zveçan.

"Në bazë të të dhënave që i morëm nga komisionet komunale zgjedhore, ju njoftojmë de të gjitha qendrat e votimit janë hapur", tha Elezi.

Numri i qendrave të votimit në komunën e leposaviçit është tetë, në Zubin Potok pesë, në Zveçan pesë dhe në veri të Mitrovicë pesë. Gjithsej, numri i qendrave të votimit në këto katër komuna është 23, me gjithsej 63 vendvotime.

Numri i qytetarëve me të drejtë vote për procesin e votimit për ose kundër ndërrimit të kryetarëve të komunave nga funksionet në katër komuna është 46.556 votues.

Elezi u bëri thirrje qytetarëve në veri ta realizojnë të drejtën e tyre të votës.

Që votimi të jetë i suksesshëm duhet që të votojnë, minimalisht, 50% + 1 qytetar. Nëse përmbushet ky kusht, atëherë brenda afateve ligjore mbahen zgjedhjet e jashtëzakonshme.

Në rast se pjesëmarrja është më e ulët se 50%+1, atëherë votimi konsiderohet i dështuar dhe një iniciativë tjetër nuk mund të merret pa kaluar 12 muaj.

Partia më e madhe e serbëve të Kosovës, Lista serbe por edhe subjekte të tjera nga ky komunitet, kumtuan se nuk do të marrin pjesë në këtë votim dhe të nejjtën e kërkuan edhe nga qytetarët serbë nga ai rajon. ab/