Shkup, 14 prill 2024 (MIA) - Me prezantimin e programeve të takimeve me qytetarë dhe tubimeve, sot vazhdon fushata zgjedhore e kandidatëve për president për rrethin e parë të zgjedhjeve të 24 prillit.

Kandidati për president i koalicionit të udhëhequr nga LSDM-ja Stevo Pendarovski sot do të vizitojë komunat Nagoriçan i vjetër, Kratovë dhe Rankovcë, ndërsa do të mbajë tubime në Kriva Pallankë dhe në Kumanovë, ndërsa kandidatja për president e mbështetur nga koalicioni i udhëhequr nga VMRO-DPMNE. Gordana Siljanovska Davkova do ta prezantojë programin para qytetarëve në komunat e Shkupit, Petrovec, Qendër dhe Kisella Vodë.

Aktivitete sot do të ketë edhe kandidati për president i Lëvizjes ZNAM- Për Maqedoninë tonë,  Maksim Dimitrievski, i cili do të ketë takime me qytetarët në tri pika në parkun e qytetit në Shkup.

Kandidatja për presidente nga e Majta, Biljana Vankovska, do ta vazhdojë fushatën mes banorëve të Komunës së Aeroportit të Shkupit, ndërsa në mbrëmje do të mbajë tubim në Kavadar.

Presidenti aktual dhe kandidat për mandat të ri, Stevo Pendarovski, mbrëmë në tubimin në Tetovë theksoi se struktura politike në pushtet në shtatë vitet e fundit ka krijuar dy konstante vitale të shtetit, integrimin euroatlantik dhe ndër- bashkëjetesë etnike, e cila, sipas tij, do të rezultojë me anëtarësim në Bashkimin Evropian për disa vite.

"Fatkeqësisht për pengesat nga disa të jashtëm, por më së shumti opozita jonë e brendshme politike, hapëm konferencën e parë të negociatave, fatkeqësisht u ndalëm këtu. Po të mos ishte opozita e brendshme, ju garantoj që për 4.5 vjet do të mbarojmë të gjitha negociatat dhe do të bëhemi anëtare e plotë e BE-së. Është e vetmja rrugë për zhvillim dhe e vetmja mënyrë për të reduktuar emigracionin e të rinjve, kryesisht në atë BE. E vetmja mënyrë është të mbështetet ky koalicion politik, përndryshe çdo gjë tjetër është rrezik dhe kthim në të kaluarën e errët, theksoi ai.

Pendarovski i është përgjigjur liderit të VMRO-DPMNE-së, Hristijan Mickoski, se me gjasë e ka zëvendësuar me paraardhësin e tij Ivanov, pasi është thirrur për nënshkrimin e marrëveshjes në vilën Vodno për amnistinë e dikujt.

"Mendoj se Mickoskit i parashikohet diçka. Më zëvendësoi me një që ishte president para meje, Gjorge Ivanov - i falte kriminelët. Nuk kam falur dhe as kam ndërmend të fal kriminelët. Ai ka shumë frikë se Gruevski do të kthehet tek ai nga ka ikur, sepse nëse Gruevski kthehet tek ai, ju e dini se kush është shefi i vërtetë atje, ai e vendosi atë në vendin ku është. Kështu që po e përsëris - asnjëherë kam pasur qëllim të amnistoj dikë, as nuk kam amnistuar, as nuk do të amnistoj. Le t'i drejtohet ish-presidentit të tij Gjorge Ivanov, i cili, meqë ra fjala, është mik personal i kandidates kundërshtare Siljanovska Davkova", shtoi Pendarovski.

Kandidatja për presidente të shtetit nga VMRO-DPMNE, Gordana Siljanovska Davkova mbrëmë, në fjalimin e saj në tubimin në komunën e Karposhit, prezantoi udhëzimet me të cilat do të udhëhiqet në kryerjen e pozitës së saj nëse merr besimin e qytetarët. Ajo kërkoi gjithashtu që gratë të përfshihen më shumë në politikë dhe të ndihmojnë vendin me përkushtimin dhe sakrificën e tyre.

Ajo tha se për të një nga prioritetet më të rëndësishme është arsimimi i mirë dhe se nuk ka investim më të mirë se ai.

"Zgjidhja ime - në kabinetin presidencial dhe rreth meje do të formoj një këshill rinor. Mjaft me teza se e ardhmja u takon të rinjve. Të rinjtë duhet ta marrin edhe të tashmen në duart e tyre. Një qeveri e zgjuar, dhe shpresoj se do të jetë e tillë, sepse nuk ka më zgjidhje – jemi futur në murin e turpit sepse diagnoza për ne siç e shihni në Freedom House është ajo – regjimi hibrid ciklik, duke u kthyer në rreth. Kjo duhet të përfundojë dhe ne duhet të bëjmë hapa përpara, tha Siljanovska Davkova.

Biljana Vankovska, kandidatja për presidente e vendit e propozuar nga partia e Majtë dje në Ohër foli për temën aktuale të zgjedhjeve presidenciale, që është përfshirja e bullgarëve në Kushtetutën e Maqedonisë.

"Unë si presidente e ardhshme nuk do të lejoj kurrë përfshirjen e bullgarëve në Kushtetutë, sepse kam një plan për një kushtetutë krejtësisht të re. Më duhet të them se të gjitha përrallat për efektin e vonuar të ndryshimeve kushtetuese janë vetëm një kurth, do të hyjmë njësoj si me Marrëveshjen e Prespës", tha ajo.

Vankovska u tha qytetarëve të Ohrit se programi i saj parasheh një iniciativë për miratimin e një kushtetute krejtësisht të re.

Kandidati për president i Frontit Evropian, Bujar Osmani, në një takim parazgjedhor me qytetarët e Ohrit, u ka potencuar atyre se në zgjedhjet e ardhshme kanë zgjedhje mes dy alternativave -  integrimit kundrejt izolimit, bashkëjetesës kundër mosbesimit dhe tensionit etnik, përparimit kundër kthimit prapa.

"Këto janë dy ofertat që u ofrohen qytetarëve në këto zgjedhje. Si kandidat i Frontit Evropian, unë ofroj integrimin në BE, edhe atë në pesë vitet e ardhshme. Rrumbullaksim të përpjekjeve shtatëvjeçare për t'u bërë anëtare e Unionit. Nëse kam arritur si ministër në hapjen e negociatave me BE-në, si president mund të premtoj se do ta përfundoj atë proces dhe deri në fund të mandatit të bëhemi anëtare e BE-së", tha Osmani.

Stevço Jakimovski, kandidati për president nga GROM-i dhe koalicioni "Guximshëm për Maqedoninë", tha dje nga Kriva Pallanka se kundërshtarët e tij Pendarovski dhe Siljanovska-Davkova i janë shmangur debatit sepse nuk kanë fuqi të përballen me argumentet për zhvillimin e shtetit. 

"Është e qartë se ata nuk janë në gjendje të dialogojnë me konkurrentët e tyre politikë, siç e shihni, ne nuk po zihemi dhe as ofendojmë, përkundrazi, ne duam vetëm të bëjmë një diskutim argumentues. Pra, si do të jenë presidentë, si do të vendosin dialog ndërmjet pushtetit dhe opozitës, si do të vendosin dialog për çështje kyçe në Republikën e Maqedonisë, nëse nuk janë të gatshëm të dialogojnë me kundërshtarët e tyre?, tha Jakimovski, duke theksuar se mund të fshihen nga debatet, por jo nga qytetarët e Republikës së Maqedonisë.

Kandidati presidencial i Lëvizjes "ZNAM" nga Prilepi Maksim Dimitrievski mbrëmë theksoi se na duhet një opsion i tretë dhe një president nga populli që do të punojë për popullin.

Kandidati për president nga Koalicioni "VLEN", Arben Taravari, së bashku me kandidatët për deputetë, dje kanë organizuar tubim në Qendrën e Kulturës në Kumanovë. Nga qytetarët u kërkua të mbështesin kandidatin për president.

Në deklaratë për media, Taravari ka theksuar se pas Ramazanit kjo është ngjarja e parë e madhe me qytetarët dhe tha se do të kërkojë mbështetjen e kumanovësve.

"Ne do të prezantojmë programin, katër shtyllat që tashmë janë deklaruar publikisht, integrimi evropian, sundimi i ligjit, siguria dhe siguria e shtetit dhe demokracia konsensuale", tha Taravari.

Sa i përket fushatës, kandidati për president Taravari tha se deri më tani ka qenë korrekte me presione të caktuara nga administrata. ls/

Foto: MIA