Македонска Каменица, 4 јануари 2025 (МИА) – Во централното градско подрачје на Македонска Каменица се финализира изградбата на нов паркинг простор.

Новото паркиралиште е со површина од 550 м² и ќе има 20 паркинг места и пристапна улица за жителите од улицата „Александар Македонски“.

Од Општина Македонска Каменица информираат дека овој инфраструктурен зафат е дел од програмата за работа на локалната самоуправа за урбан развој и подобрување на условите во сообраќајот во Македонска Каменица.

Од општинската прес-служба информираат дека просторот ќе биде опремен со современа урбана опрема и ќе се изврши хортикултурно уредување.

- Проектот се реализира во рамките на Договорот за бетонски работи и партерно уредување на јавни површини, со цел да се обезбедат подобри услови за паркирање, како и поголема безбедност и функционалност на сообраќајот во градот. Со овој проект ја покажуваме нашата заложба за создавање на поудобен и современ градски живот за сите наши сограѓани, изјавил градоначалникот на Општина Македонска Каменица, Димчо Атанасовски. фф/бак/

Фото: Општина Македонска Каменица