Џуба, 27 март 2025 (МИА) - СAД го повикаа претседателот на Јужен Судан, Салва Кир да го ослободи неговиот ривал, првиот потпретседател Рик Мачар, кој, според извештаите, е ставен во домашен притвор.

Според соопштението на партијата СПЛМ-ИО на Мачар, министерот за одбрана и началникот на националната безбедност вчера насилно влегле во неговата резиденција и му врачиле налог за апсење.

Мачар, кој моментално е дома со сопругата и двајцата телохранители, е обвинет за вмешаност во судирите меѓу армијата и милицијата позната како Бела армија во областа Насир во државата Горен Нил овој месец.

„Загрижени сме од извештаите дека првиот потпретседател на Јужен Судан, Рик Мачар е ставен во домашен притвор. Го повикуваме претседателот Кир да ја повлече оваа одлука и да спречи понатамошно влошување на ситуацијата“, се вели во соопштението на американското биро за африкански прашања објавено на Икс.

Обединетите нации предупредија дека неодамнешните судири во Насир и порастот на говорот на омраза може повторно да го разгорат етнички мотивираниот конфликт.

Партијата на Мачар негира каква било поврзаност со Белата армија. рп/

Фото: МИА архива