Дебар, 9 март 2026 (МИА) - Локалната власт на Дебар и раководството на општинското комунално  претпријатие  „Стандард" со цел чист град и околина, преземаат активности за да обезбедат управувањето со отпадот и одржувањето на животната средина да биде според стандардите што се практикуваат во Европа.

Во тие рамки за време на посетата на Љубљана, Словенија, градоначалникот на Општина Дебар, Фисник Меља, заедно со директорот на „Стандард“,  Нертиљ Османи, реализирале работна посета на Регионалниот центар за управување со отпад RCERO Љубљана, еден од најнапредните центри во Европа за третман и управување со комунален отпад. 
 
-За време на посетата, имавме можност одблиску да се запознаеме со функционирањето на интегрираниот систем за управување со отпад што се применува во градот Љубљана и во поширокиот регион, рече за МИА, директорот Османи. 
 
Претставниците на Центарот ни ги презентираа главните процеси на третман на отпадот, вклучувајќи селекција и механичка обработка на отпадот, биолошки третман, поврат на рециклирани материјали и намалување на количината на отпад што завршува на депонија. 
 
-Во рамки на посетата остваривме средба и со раководителот на секторот за заштита на животната средина на градот Љубљана, каде се разговараше за политиките и практиките што градот Љубљана ги применува во областа на заштитата на животната средина, одржливиот развој и современото управување со комуналните услуги, додаде тој. 

Посочи дека Центарот RCERO Љубљана претставува успешен модел за современо управување со отпад, кој се базира на принципите на циркуларната економија, ефикасното користење на ресурсите и заштитата на животната средина. 
 
Оценува дека посетата претставуваше значајна можност за размена на искуства и запознавање со најдобрите европски практики, кои можат да придонесат за подобрување и модернизација на системот за управување со отпад во Општина Дебар.  
 
Претходно, за време на престојот во Љубљана, градоначалникот  Меља, оствари средба градоначалникот  Зоран Јанкович, со кого договориле соработка меѓу другото и  за урбан развој и заштита на животната средина. вт/дма/
 
Фото: Општина Дебар