Shkup, 17 korrik 2023 (MIA) - Sundimi i ligjit për çdo vend është një nga segmentet kyçe dhe përparimi në këtë sferë është vendimtar, theksuan sot Sekretarja e Shtetit përgjegjëse për Evropën në Këshillin e Ministrave të Republikës së Francës, Lorans Bun, Ministrja për Evropën dhe Klimën e Republikës Federale të Gjermanisë Ana Lirman, si dhe ministri për Bashkimin Evropian i Republikës së Polonisë Shimon Shinkovski vel Senk.

Ata në konferencën e përbashkët për media pas takimit me zëvendëskryeministrin për Çështje Evropiane Bojan Mariçiq, duke iu përgjigjur pyetjeve të gazetarëve, sqaruan se çdo shtet është nën llupë për sistemin e drejtësisë dhe asnjëri prej tyre nuk ka trajtim të veçantë në lidhje me këtë çështje.

Negociatat me BE-në do të theksojnë sundimin e ligjit, si në të gjitha vendet në procesin e anëtarësimit, tha "Treshja e Vajmarit".

"Të gjithë jemi subjekt i rishikimeve të shtetit ligjor dhe kontrolleve, informacioneve dhe dezinformatave, duhet të forcojmë lirinë dhe mediat e pavarura, të gjithë jemi nën llupë për sistemin e drejtësisë, të gjithë duhet të kalojmë procesin për të mbrojtur Kushtetutën dhe demokracinë. Nuk ka trajtim të veçantë, është i njëjti trajtim, nuk na dallon nga fqinji më demokratik", theksoi Bun.

Sipas Lirman, kur të miratohen ndryshimet kushtetuese dhe të fillojnë zyrtarisht negociatat me hapjen e kapitujve të parë, klasteri i shtetit ligjor do të jetë vendimtar.

"Jemi të bindur se me përkushtimin e Qeverisë dhe me reformat, mund të arrihet shumë shpejt përparim, veçanërisht sepse për popullin e Maqedonisë së Veriut, përparimi në sundimin e ligjit është vendimtar - do të ndihmojë në luftën kundër korrupsionit, në forcimin e demokracisë dhe ndërtimin e prosperitetit. Negociatat me BE-në do të theksojnë sundimin e ligjit, si në të gjitha vendet në procesin e anëtarësimit. Është shumë e qartë se anëtarësimi në BE është një proces i rregulluar me përpikshmëri me disa kapituj që aktualisht po kalojnë skriningun teknik. Zëvendëskryeministri vjen rregullisht në Bruksel dhe këto takime shkojnë shumë mirë, po bëhet përparim", theksoi Lirman.

Ministri Shinkovski Vel Senk përsëriti se ka kushte që duhet të plotësohen për anëtarësim në BE, por edhe Maqedonia e Veriut duhet të njihet për atë që ka bërë në vitet e kaluara.

"Ne erdhëm jo vetëm për të sjellë disa pritje dhe kushte, por edhe për të shprehur së bashku mbështetjen tonë, për të shprehur mirëkuptimin për hapat që Maqedonia e Veriut ka ndërmarrë tashmë në vitet e kaluara. Është e rëndësishme të njihni të gjitha përpjekjet tuaja, është e rëndësishme të njihni BE-në. Natyrisht, ne kemi disa kushte që do t'ju duhet t'i përmbushni pas hapjes së negociatave, por keni shumë të drejtë që prisni hapjen e klasterave me shpresë deri në fund të vitit dhe ne do t'ju mbështesim në këtë rrugë", tha  Shinkovski Vel Senk. sa/

foto: MIA