Uashington, 17 prill 2025 (MIA) - Presidenti i SHBA-së, Donald Tramp, shprehu besimin "100 për qind" për arritjen e një "marrëveshjeje tregtare" në kontestin e vazhdueshëm tarifor me Bashkimin Evropian, gjatë takimit të sotëm me kryeministren italiane Xhorxha Meloni në Shtëpinë e Bardhë.

"Do të ketë një marrëveshje tregtare, 100 për qind", tha Trampi.

Ai po i përgjigjej pyetjes së një gazetari se çfarë do të ndodhte nëse nuk do të kishte marrëveshje në fund të pauzës 90-ditore që kishte vendosur - dhe reagoi pothuajse në mënyrë tallëse", raportoi DPA.

"Çfarë, ju mendoni se nuk do të ketë... sigurisht që do të ketë një marrëveshje tregtare. Shumë duan të bëjnë një marrëveshje, shumë, shumë. Dhe ne do të bëjmë një marrëveshje tregtare. E pres plotësisht, por do të jetë një marrëveshje e drejtë", tha Trampi.

Javën e kaluar, pas turbulencave të konsiderueshme në tregjet e aksioneve dhe tregjet financiare, Trampi papritur vendosi t'u japë shumë vendeve, përfshirë BE-në, një pushim 90-ditor nga tarifat e caktuara.

Këto tarifa janë ndëshkuese dhe bazohen në deficitin tregtar të vendeve përkatëse, me përjashtim të Kinës.

Me këtë vendim, Trampi vendosi përkohësisht në pritje një pjesë të paketës së tij të gjerë tarifore. BE-ja njoftoi gjithashtu se do të pezullojë tarifat e planifikuara hakmarrëse për produktet amerikane për 90 ditë. sa/

Foto: DPA