Bruksel, 25 mars 2024 (MIA) - Bashkimi Evropian është i gatshëm për bashkëpunim në luftën kundër terrorizmit me Rusinë, nëse merr propozim për këtë të bazuar në baza racionale dhe respektim të rregullave ndërkombëtare, deklaroi sot zëdhënësi i Komisionit Evropian për Punë të Jashtme dhe Politikë të Sigurisë, Peter Stano.

Në përgjigje të pyetjes së një gazetari për mundësinë e mundshme të një lloj bashkëpunimi midis BE-së dhe Rusisë në luftën kundër terrorizmit pas sulmeve terroriste në Moskë, Stano kujtoi se pas fillimit të agresionit rus kundër Ukrainës, Unioni pezulloi të gjithë bashkëpunimin me Rusinë për shkak të mosrespektimit të të drejtave ndërkombëtare dhe humanitare dhe të Kartës së OKB-së.

"Megjithatë, ne ishim shumë të qartë në dënimin tonë të asaj që ndodhi në Moskë. Për ne nuk ka dyshim se këto ishin sulme terroriste. Nëse Moska del me një propozim që ka një bazë racionale dhe bazohet në respektimin e rregullave ndërkombëtare, Bashkimi Evropian nuk do të thotë "Jo". Por në këtë moment jemi përballë një regjimi që zvarrit dhe e mban vendin në një luftë të paligjshme dhe një regjim që shtyp popullsinë e tij me një numër të madh masash, ndaj do të ishte e vështirë të kuptohej se cila do të ishte baza e atij bashkëpunimi, deklaroi Stano duke shtuar se BE-ja është një nga partnerët ndërkombëtarë më të përgjegjshëm sa i përket bashkëpunimit në luftën kundër terrorizmit.

Ai thekson se këto nuk janë sulmet e para terroriste në territorin e Rusisë dhe asnjë prej tyre nuk është zbardhur me një hetim të duhur.

“Kjo ngre shumë pikëpyetje për sjelljen e autoriteteve”, shtoi Stano.

Ai gjithashtu theksoi se BE-ja i bën thirrje qeverisë së Rusisë që të mos përdorë sulmet terroriste në Moskë si justifikim për të intensifikuar agresionin e paligjshëm kundër Ukrainës ose për të rritur represionin e brendshëm në vend.

Sipas tij, BE-ja shpreh shqetësim edhe për përpjekjet e përfaqësuesve të regjimit në Moskë për të lidhur dy sulmet terroriste me Ukrainën dhe i hedh poshtë plotësisht pretendimet e tilla.

“Nuk ka asnjë indikacion, asnjë provë apo ndonjë gjë tjetër që do të tregonte se Ukraina është e lidhur me sulmet në çfarëdo mënyre”, shtoi Stano.

Lidhur me një rritje të mundshme të nivelit të kërcënimit të sigurisë në BE si përgjigje ndaj sulmeve, zëdhënësi i KE-së për drejtësi, barazi dhe sundim të ligjit Kristian Vigand deklaroi se siguria e Evropës është një prioritet për Komisionin Evropian dhe se ajo ka ndërmarrë disa masa për forcimin e sigurisë, por që marrja e një vendimi për të ngritur nivelin e kërcënimit të sigurisë është në kompetencën e vendeve anëtare, gjë që disa prej tyre e kanë bërë tashmë. ls/

Foto: Arkivi i MIA-s