Bratisllavë, 12 qershor 2024 (MIA) - Qeveria sllovake planifikon ta rrisë mbrojtjen personale të politikanëve, si dhe rregulla më të ashpra për protesta pas  atentatit ndaj kryeministrit Robert Fico muajin e kaluar.

Planet nuk bëhen vetëm për anëtarët e qeverisë, por edhe për udhëheqësit e partive opozitare, sipas ndryshimeve ligjore të miratuara nga kabineti tripartiak në Bratisllavë.

Ato ende duhet të miratohen nga parlamenti, ku partitë e koalicionit kanë shumicë të mjaftueshme.

Kryeministri Fico u lëndua rëndë pasi u plagos disa herë nga kundërshtari i qeverisë më 15 maj. Detyrat e tij zyrtare i ndërmori zëvendëskryeministri Robert Kalinak.

Dispozitat e reja ligjore përfshijnë edhe rregulla më të ashpra për tubime të protestave. Protestuesve më nuk u lejohet të mblidhen direkt para ndërtesës së qeverisë ose zyrës presidenciale, parlamentit ose gjykatave dhe duhet të mbajnë distancë minimale prej 50 metra.

Sfera private e nëpunësve publikë duhet të mbrohet më fort.

Do të ndalohen protestat para spitaleve dhe rezidencave private të mjekëve, gazetarëve dhe personave të tjerë që janë bërë cak i kritikave publike për shkak të veprimtarisë së tyre profesionale.sa/