• e enjte, 18 korrik 2024

Siljanovska Davkova: Rajoni nuk ka nevojë për retorikë të zhveshur të BE-së, por logjikë të qëndrueshme të BE-së, jo për t'u bllokuar, por për të bashkëpunuar dhe mbështetur

Siljanovska Davkova: Rajoni nuk ka nevojë për retorikë të zhveshur të BE-së, por logjikë të qëndrueshme të BE-së, jo për t'u bllokuar, por për të bashkëpunuar dhe mbështetur

Shkup, 14 qershor 2024 (MIA) - Ne kemi përgjegjësi të përbashkët për të kontribuar në ruajtjen e paqes në Evropë, ndërtimin e një kontinenti demokratik, të sigurt dhe të begatë, tha Presidentja Gordana Siljanovska Davkova në fjalën e saj në Samitin e krerëve të shteteve dhe Qeverive të pjesëmarrësve në Procesin e Bashkëpunimit të Evropës Juglindore (SEECP), të mbajtur dje në Shkup, si aktivitet përfundimtar brenda kryesimit maqedonase të Procesit nën moton "Tejkalimi i ndarjeve, ndërtimi i besimit".

Siljanovska Davkova, siç njoftoi kabineti i saj, vlerësoi se në 28 vitet e fundit, Procesi ka ndihmuar pjesëmarrësit të mbyllin disa çështje të hapura, të ndërtojnë besim të ndërsjellë dhe të bashkëpunojnë në arritjen e qëllimit të përbashkët, i cili është që e gjithë Evropa Juglindore të marrë një flamur të përbashkët – flamurin e Bashkimit Evropian.

Këto angazhime të përbashkëta, sipas saj, kanë dhënë rezultate konkrete - disa janë bërë anëtarë të plotë, të tjerët kanë filluar negociatat e anëtarësimit, e të tjerët janë kandidatë ose kanë parashtruar kërkesë për anëtarësim.

"Por përkundër arritjeve të padiskutueshme deri më tani, jemi dëshmitarë të një ngadalësimi të bashkëpunimit rajonal, veçanërisht në vitet e fundit, për shkak të stagnimit në integrimin evropian, infrastrukturës së pamjaftueshme dhe lidhjes energjetike, plakjes demografike dhe emigrimit masiv të të rinjve. E gjithë kjo, tha Siljanovska Davkova, arriti kulmin në agresionin rus kundër Ukrainës, i cili është një kërcënim për paqen dhe stabilitetin, por edhe për sigurinë njerëzore dhe energjetike dhe sigurinë ushqimore.

Sipas Presidentes, besimi ndërtohet duke mohuar standardet e dyfishta dhe duke respektuar ligjin dhe drejtësinë, parimet e së drejtës ndërkombëtare, duke përfshirë mosndërhyrjen në punët e brendshme të shteteve.

"Në kontekstin e integrimit evropian, kjo nënkupton që pjesëmarrësit në Procesin nga rajoni duhet të insistojnë në kriteret e Kopenhagës si kushti i vetëm për anëtarësim në BE. Vetoja është në kundërshtim jo vetëm me logjikën e Bashkimit Evropian, por edhe me prosperitetin e të gjithë rajonit. Në vend që të bllokojmë njëri-tjetrin, ne duhet të sillemi në mënyrë skandinave, të bashkëpunojmë dhe të mbështesim njëri-tjetrin, tha Presidentja Siljanovska Davkova.

Lidhur me reformat evropiane, ajo theksoi se rajoni nuk ka nevojë për retorikë të zhveshur të BE-së, por për logjikë të qëndrueshme të BE-së.

"Me fjalë të tjera, ne kemi nevojë për një kulturë politike demokratike, shtet të së drejtës dhe një shtet funksional të së drejtës, të drejtat e njeriut dhe liritë themelore, administratë profesionale dhe kompetente dhe ekonomi konkurruese. Dhe mënyra më e mirë, më efektive për të implementuar këto përfitime evropiane është nëpërmjet negociatave dhe anëtarësimit", tha presidentja.

Por, siç theksoi, në mënyrë që bashkëpunimi rajonal të jetë më efektiv, sinergjia rajonale duhet të vazhdojë të ndërtohet midis proceseve të tilla si Procesi i Berlinit, Këshilli i Bashkëpunimit Rajonal dhe Procesi Bërdo-Brijuni.

"Unë pres që, pavarësisht nga konstelacioni paszgjedhor në Bashkimin Evropian, zgjerimi të mbetet në agjendën e Komisionit të ardhshëm Evropian. Kjo është e rëndësishme sepse zgjerimi është një investim gjeostrategjik për paqen, sigurinë, stabilitetin dhe prosperitetin", tha Presidentja Siljanovska Davkova në fjalën e saj në Samitin e krerëve të shteteve dhe qeverive të pjesëmarrësve të SEECP.

Në kuadër të Samitit, siç informohet nga kabineti i Siljanovska Davkova, u caktua një takim plenar i krerëve të delegacioneve, i ndjekur nga një konferencë e përbashkët për media nga presidenti aktual, i mëparshëm dhe i ardhshëm i Procesit të bashkëpunimit në Evropën Juglindore.

Procesi i Bashkëpunimit të Evropës Juglindore, si një forum për bashkëpunimin rajonal, u themelua në vitin 1996 dhe përfshin të 13 pjesëmarrësit nga Evropa Juglindore në mënyrë që të gjejnë një zgjidhje për çështjet rajonale, të forcojnë marrëdhëniet e fqinjësisë së mirë, të promovojnë dialogun dhe bashkëpunimin dhe të nxisin integrimin evropian dhe euroatlantik të vendeve të Evropës Juglindore. Në këtë drejtim, qëllimet kryesore të SEECP janë nxitja e bashkëpunimit politik dhe të sigurisë, nxitja e bashkëpunimit ekonomik dhe zgjerimi i bashkëpunimit në fushën e të drejtave të njeriut, demokracisë dhe drejtësisë. sa/ev/

Foto: Kabineti i Siljanovska Davkova

 

QËNDRONI TË LIDHUR