Gjenevë, 14 qershor 2024 (MIA) - Liderët botërorë do t'i bashkohen presidentit ukrainas Volodimir Zelenski këtë fundjavë në një samit në të cilin do të shqyrtohen opsionet për t'i dhënë fund konfliktit më të përgjakshëm në Evropë që nga Lufta e Dytë Botërore, por Rusia nuk është ftuar dhe ngjarja nuk do të plotësojë qëllimin e Kievit për të izoluar Moskën.

Nënkryetarja amerikane Kamala Harris, presidenti francez Emanuel Makron dhe liderët e Gjermanisë, Italisë, Britanisë, Kanadasë dhe Japonisë janë ndër ata që do të mbërrijnë në takimin në qendrën dimërore zvicerane Buergenshtok më 15 dhe 16 qershor.

India, e cila ndihmoi Moskën t'i mbijetojë tronditjes së sanksioneve, pritet të dërgojë një delegacion. Turqia dhe Hungaria, të cilat gjithashtu mbajnë lidhje me Rusinë, do të përfaqësohen nga ministrat e Punëve të Jashtme.

“Ky takim është i suksesshëm. Sjellja e vendeve që janë partnerë dhe atyre që nuk janë në të njëjtën tryezë ishte një detyrë e madhe për Ukrainën”, tha Zelenski të martën në Berlin.

Të mërkurën, Zelenski e vizitoi Arabinë Saudite dhe diskutoi për përgatitjet për samitin me Princin e Kurorës Mohamed bin Salman, por mbeti e paqartë nëse mbretëria do të dërgonte një përfaqësues të saj.

Ulrih Shmid, politikolog dhe ekspert për Evropën Lindore në Universitetin e Shën Gallen në Zvicër e quajti samitin një "shportë me gjithçka", duke qenë se disa vende e mbështesin atë, ndërsa Kina nuk është e pranishme.

Pyetja është, a është e mundur paqja?" “Përderisa (Presidenti rus Vladimir) Putin është në pushtet, është e vështirë”, tha Shmid.

Pas një sërë takimesh përgatitore, lufta në Gazë e largoi pjesërisht vëmendjen nga Ukraina dhe Moska bëri çmos për të minimizuar rëndësinë e samitit. Ndërkohë, Kina dhe Brazili kanë nisur iniciativën e tyre të paqes, e cila përfshin pjesëmarrjen e të dy palëve ndërluftuese.

Mbledhja vjen në një kohë jo të lehtë për Ukrainën në fushën e betejës, pasi forcat ruse, të cilat kontrollojnë rreth 18 për qind të territorit të Ukrainës, përparojnë në lindje të vendit.

Duke pasur parasysh të gjitha gjërat, samiti nuk do të merret me çështje territoriale dhe do të fokusohet në ato pjesë të planit të paqes të Zelenskit që janë mjaft të përgjithshme për t'u pranuar nga shumica e pjesëmarrësve. Këto përfshijnë sigurinë ushqimore, sigurinë bërthamore, lirinë e navigacionit dhe shkëmbimin e të burgosurve, thanë zyrtarët.

Në kuadër të përgatitjeve për samitin zviceran është diskutuar edhe se ku dhe kur do të mbahet takimi i radhës. Andrij Jermak, shefi i zyrës së Zelenskit u tha gazetarëve këtë javë se "një numër vendesh" ishin të interesuara.

"Ne po shqyrtojmë mundësinë e një samiti të dytë në të cilin do të ftohen përfaqësues të Rusisë," tha Jermak.

Zvicra dëshiron që Burgenshtok të hapë rrugën për një "proces të ardhshëm paqeje" në të cilin do të marrë pjesë edhe Moska. ls/

Foto: EPA