Shkup, 5 mars 2025 (MIA) – Jemi këtu për t'i mbështetur, por edhe për t'i frymëzuar vajzat e reja rome që të ëndërrojnë dhe të arrijnë qëllimet e tyre. Ju jeni ato që duhet të ndryshoni situatën në vendin tonë dhe në botë, tha Shaban Saliu, ministër i ngarkuar për Integrimin dhe Zbatimin e Strategjisë për Përfshirjen e Romëve 2022-2030, në hapjen e panelit “Zërat e grave rome: nga sfida në suksese”, kushtuar avancimit të të drejtave dhe mundësive të grave rome.

"Gratë rome janë aktive në të gjitha sferat e shoqërisë – në kulturë, biznes, politikë, sektorin civil. Këmbëngulja dhe kontributi i tyre janë të paçmuar. Sot me krenari mund të themi se gratë rome janë mjeke, inxhiniere, sipërmarrëse, aktiviste. Sukseset e tyre janë rezultat i mundit, përkushtimit dhe sakrificës së madhe, pasi ato jo vetëm që u përballën me sfidat në shoqërinë e gjerë, por shpesh edhe brenda komunitetit të tyre", tha Saliu.

Ai theksoi se Qeveria mbetet e përkushtuar në zbatimin e Strategjisë për Përfshirjen e Romëve 2022-2030 me fokus të veçantë në fuqizimin e grave në komunitetin rom.

Vesna Ivanoviq-Kastared, shefe e zyrës së UN Women në Maqedoninë e Veriut, theksoi se për tre ditë do të shënohet Dita Ndërkombëtare e Gruas, një ditë që ka kuptim simbolik dhe të thellë për çdo grua dhe çdo shoqëri, pasi pasqyron luftën shekullore të grave për barazi politike, ekonomike dhe sociale, përkatësisht barazi në të gjitha sferat e jetës në shtëpi dhe në shoqëri. Ajo tha se ka ende shumë fusha në të gjitha sferat e jetës ku gratë përballen me sfida dhe pabarazi.

Kur flasim për sfidat, shtoi ajo, është e rëndësishme të propozojmë zgjidhje për problemet, të inkurajojmë vajzat me shembuj pozitivë dhe t'i motivojmë të kuptojnë se pavarësisht nga vijmë, të gjithë kemi të drejtën e qasjes së njejtë dhe mundësive.

Ngjarja, e organizuar nga Ministria në bashkëpunim me UN Women Maqedonia e Veriut, pati dy panele ku Mersiha Usein, Nexhmie Saitova, Sevdija Abdulova, Bajsa Arifovska, Ines Amet dhe Sarita Jasharova prezantuan rrugën e tyre drejt suksesit dhe sfidat me të cilat u përballën gjatë rrugës për arritjen e barazisë gjinore dhe përfshirjes më të madhe në shoqëri. Qëllimi është që ato të frymëzojnë brezin e ri të grave rome për një përfshirje më të madhe në shoqëri. sa/

Foto: MIA