Prilep, 27 korrik 2025 (MIA) - Ministria e Ekonomisë dhe Punës kërkon që Qeveria të rrisë buxhetin për mbështetjen e bizneseve gjatë vetëpunësimit. Buxheti për mbështetjen e bizneseve të vogla do të rritet për rreth 2,5 milionë euro, deklaroi në Prilep Marjan Risteski, zëvendësministër i Ekonomisë dhe Punës.

Për projektet e vetëpunësimit, buxheti do të rritet nga pesë në 7,5 milionë euro. Kjo për shkak se është i madh interesi për tre shpalljet e Agjencisë së Punësimit për masën më tërheqëse në planin e gjerë operativ të punësimit që mbulon 40 për qind të të rinjve. Ka rreth 6,000 aplikime në shpalljet. Në vend të 1,750, shteti do të mbështesë 2,600 persona që do të fillojnë biznesin e tyre, njoftoi Risteski. Ministria e Ekonomisë dhe Punës do të kërkojë më shumë para në seancën e ardhshme qeveritare.

"Në përputhje me këtë, si Ministri, si propozim, së bashku me APRMV-në, kemi kërkuar dhe presim nga Qeveria një rialokim të mjeteve financiare në seancën e ardhshme qeveritare. Presim që të ndahen 300 milionë denarë të rinj të cilët do të përdoren për këtë masë shumë tërheqëse, masën e vetëpunësimit. Kjo do ta rriste numrin në 2.600 persona që do të hapnin biznesin e tyre, kryesisht të rinj deri në 29 vjeç, por do të përfshijë edhe të gjithë kërkuesit aktivë të punës mbi 29 vjeç. Më lejoni të përmend se kjo masë do të mbështetet edhe me 160 milionë denarë shtesë të cilat sigurohen nga ribalanci i buxhetit. Ose, në total, këto masa do të mbështeten me një buxhet të rritur prej mbi 7,5 milionë euro", tha Risteski.

Sa i përket shportës së konsumatorit dhe llogaritjes së saj, ajo do të jetë në rendin e ditës të Këshillit Ekonomik dhe Social (KES). Nga kjo do të varet se çfarë masa do të ndërmarrë Qeveria. Risteski shpreson që KES të mblidhet deri në fund të javës së ardhshme. ls/

Foto: MIA