Shkup, 24 shkurt 2025 (MIA) – Qeveria sot edhe zyrtarisht e paralajmëroi fillimin e rikonstruimit të Spitalit të Përgjithshëm të Qytetit (SPQ) “8 Shtatori” dhe të aeroportit të Ohrit “Shën Apostoll Pali”. Siç paralajmëroi në konferencë për media, për dy objektet do të investohen gjithsej 14,7 milionë euro. Rikonstrumi i spitalit duhet të përfundojë deri në tetor të këtij viti, ndërsa i aeroportit të Ohrit deri në mars të vitit 2026. 

Siç bëri të ditur Qeveria, nga mjetet e planifikuara, 12 milionë euro janë për SPQ “8 Shtatori”, ndërsa 2,7 milionë për “Shën Apostoll Pali”. 

Sipas ministrit të Transportit, Aleksandar Nikolloski, me rikonstruimin e aeroportit do të sigurohen kushte më të mira, moderne dhe do të rritet numri i udhëtarëve, përderisa spitali, përveç se do të ketë kushte më bashkëkohore për punë, do të mundësojë edhe cilësi të lartë të shërbimeve shëndetësore për qytetarët. 

“Në SPQ ‘8 Shtatori’ do të përfshihet bllok operativ me sipërfaqe prej 2.000 metra katrorë dhe shtatë salla kirurgjikale, dy për kirurgji abdominale, dy për ndërhyrje urologjike, një sallë për vesh, hundë dhe fyt, një për kirurgji në sy dhe një për kirurgji robotike. Të gjitha sallat do të kenë pajisjet më të fundit, tavolina kirurgjikale dhe aparate anestezie, kompjuterë mjekësorë, defibrilatorë dhe pajisje të tjera. Rikonstruksioni përfshin gjithashtu një laborator biokimik me pajisje plotësisht të automatizuara, një laborator mikrobiologjik, si dhe një laborator patologjik me futjen e analizave farmako-gjenetike sipas standardeve më të fundit botërore që mundësojnë terapi të synuar dhe të personalizuar për pacientët onkologjikë. Njësia e kujdesit intensiv do të jetë 500 metra katrorë në sipërfaqe me shtatë kuti pacientësh të pajisura plotësisht me monitorim qendror. Do të ndërrohet edhe struktura e çatisë së spitalit, e cila u konstatua si një nga problemet kryesore, do të vendoset një sistem efikas i ngrohjes dhe ftohjes dhe do të rikonstruktohen ashensorët”, theksoi Nikolloski.

Sipas tij, Aeroporti i Ohrit do të ketë ndërtesë të re administrative prej 250 metra katrorë, ndërsa janë rinovuar edhe segmentet e tjera. Do të përshtatet dhe pajiset edhe hapësira e ndërtesës ekzistuese terminale. 

“Hapësira e re e zyrës do të jetë 120 metra katrorë, do të ketë edhe sipërfaqe ndihmëse prej 130 metrash katrorë, si dhe një zonë të re të dedikuar sigurie prej 40 metrash katrorë. Për parkingun e ri është planifikuar edhe një regjim krejtësisht i ri i komunikacionit”, tha Nikolloski, duke theksuar se kjo do të nënkuptojë rikonstruksionin e parë të terminalit të aeroportit që nga ndërtimi i tij.

Duke folur për rokonstrumin e SPQ “8 Shtatori”, ministri i Shëndetësisë, Arben Taravari theksoi se kjo është edhe një tregues i angazhimeve qeveritare për përmirësimin e kushteve në sektorin shëndetësor. 

Kryeministri Hristian Mickoski në paraqitjen e shkurtër nënvizoi se kujdesi i një qeverie për qytetarët e saj shihet në kapacitetet që do t’i ndërtojë dhe burimet të cilat do t’i vendosë në dispozicion. 

“Duam të shënojmë dhe shpallim fillimin e rikonstruksionit të këtyre dy objekteve jetike. Shëndetësia ishte një nga fushat më të neglizhuara, ku neglizhenca e vazhdueshme e qeverisë së mëparshme çoi në shembjen e spitaleve dhe objekteve tashmë të rrënuara. Këtu më duhet të bëj nderime për një pjesë të madhe të stafit të përkushtuar shëndetësor, të cilët edhe në kushte të tilla vazhduan të punojnë me përkushtim dhe në disa kushte nën standarde dhanë maksimumin. Këto janë investime dhe projekte madhore për objekte të një rëndësie thelbësore për vendin tonë. Ne vazhdojmë të jemi të përkushtuar për zgjidhjen e problemeve, krijimin e vlerës së shtuar dhe luftën për një jetë më të mirë të qytetarëve”, tha Mickoski. fc/

Fotografia: MIA dhe Qeveria e RMV-së

Video: Qeveria e RMV-së