Strugë, 31 tetor 2025 (MIA) - Kandidati i pavarur për kryetar të Komunës së Strugës, Mendi Qyra sot në konferencë për shtyp akuzoi se një aktivist i Aleancës për shqiptarët e ka sulmuar fizikisht një të punësuar në shkollën e fshatit Ladorishtë.

Sipas tij, në të njejtën shkollë, paraprakisht të punësuarit morën porosi të drejtpërdrejta nga drejtori Shefi Cenka, i cili i ka urdhëruar të marrin pjesë në tubimet e organizuara nga Aleakca kombëtare për integrim.

"Kjo paraqet keqpërdorim të hapur të detyrës zyrtare, ku nëpunësit publikë shfrytëzohen si instrument politik. Ky rast është vetëm kulmi i presioneve, kërcënimeve dhe shantazheve. Në ditët e fundit qytetarët e Strugës u përballën edhe me dukuri të tjera të neveritshme. Vetë Ziadin Sela u dërgonte porosi ofenduese qytetarëve", akuzoi Qyra.

Ai theksoi se persona nga Aleanca për shqiptarët në rrjetet sociale publikisht kanë sulmuar vajza dhe të rinj që kanë marrë pjesë në fushatën e tij, ndërkaq janë frikësuar dhe linçuar edhe gazetarë dhe mediume.

Nëse e fiton besimin e qytetarëve Qyra premtoi se si kryetar i komunës nuk do të merret me të punësuarit në administratë, por se do të ketë përgjegjësi për drejtorët të cilët i keqpërdorën për interesa personale dhe partiake.

"Më 2 nëntor, do ta përfundojmë politizimin në institucionet publike. U bëj thirrje të gjithë qytetarëve, drejtorëve, udhëheqësve, institucioneve, të jenë të qetë këto ditë, sepse fushata jonë ishte e qartë, të lëvizim në paqe, të bëjmë fushatë të qetë dhe civilizuese", deklaroi Qyra. ab/

Foto: Mendi Qyra