Shkup, 16 shkurt 2023 (MIA) - Qëllimi ynë është që të stabilizohet shumica në Kuvend, të përforcohet Qeveria që në këtë vit të mandatit të hyjmë në reforma, në stabilizimin e shtetit nga krizat që zgjasin tre vjet njëra pas tjetrës, siç ishin kriza shëndetësore, energjetike dhe ekonomike, por edhe sigurimi i një blloku për Maqedoninë evropiane që do të sjellë reformat e nevojshme, të përfundojë skriningu, të hapë hapësirë ​​për fazën tjetër të negociatave dhe të krijojë kushte për një shumicë prej dy të tretash për të miratuar ndryshimet e nevojshme kushtetuese.

Ky është mesazhi i zëvendëskryeministrit për Çështje Evropiane, Bojan Mariçiq, në emisionin Vin vin të mbrëmjes së sotme në televizionin Telma.

"Opozita e udhëhequr nga VMRO-DPMNE nuk e humb rastin që ta zbrazë Kuvendin nga esenca e tij dhe thjesht t'i zvarritë proceset", tha Mariçiq.

Këtë, shtoi Mariçiq e shohim edhe me seancën për rikonstruimin e Qeverisë, ku shohim të njëjtat fjalime me të njëjtat pika, të cilat synojnë të blejnë kohë dhe ndoshta të krijojnë një nervozizëm në qeveri.

Duke iu referuar zgjerimit të shumicës parlamentare, Mariçiq tha se kjo po bëhet me qëllim të forcimit të frontit evropian, duke shtuar se bllokadat e VMRO-DPMNE-së nuk janë asgjë e re dhe po vazhdojnë që tre vjet.

"Dera për bisedë nuk mbyllet kurrë, por ata refuzojnë për pesë vjet të jenë pjesë e zgjidhjes. Sot për t'u defokusuar nga tema e bisedës, e dialogut dhe se në çfarë kushtesh mund të mbështesin amendamentet kushtetuese që dalin nga korniza e negociatave, ata përsërisin vazhdimisht kërkesën për zgjedhje të parakohshme parlamentare, tha ndër të tjera zëvendëskryeministri për çështje evropiane.

Sa i përket propozimit francez, Mariçiq u shpreh se ky propozim nuk është ideal, por na jep mundësi në shumë pika të jemi në një bazë barazie dhe reciproke me Bullgarinë dhe të veprojmë në mënyrë reciproke.

“Komisionin historik e konsideroj një avantazh të madh, sepse aty janë ulur ekspertë, të cilëve politikanët nuk mund t'u diktojnë dhe asnjëherë nuk kanë diktuar se çfarë të thonë", tha zëvendëskryeministri Mariçiq.

Sipas zëvendëskryeministrit Mariçiq, politikanët nga pala bullgare dhe nga ana jonë janë të drejtë në masën më të madhe, sidomos zyrtarët e qeverisë dhe shtetit, deri më tani nuk kemi qenë shkak për provokim. Kemi faktorë politikë, nënvizoi ai, që qëllimisht hyjnë në provokimin e maqedonasve dhe Maqedonisë së Veriut për të provokuar reagimin tonë, që të bëhet temë në Bullgari.

"Ajo që, për fat të keq, për mua është një gabim i madh dhe kyç nga ana e Bullgarisë, është vizita e Petkovit në hapjen e klubit "Vanço Mihailov" në Manastir. Kjo ishte pika kthese që i çoi gjërat në drejtimin e gabuar. Përndryshe, mendoj se deri atëherë kemi pasur rezultate serioze, të cilat ndryshuan perceptimin për Bullgarinë në Maqedoninë e Veriut dhe anasjelltas dhe i afruan popujt dhe qeveritë që të mund të zgjidhnin problemet që janë me rëndësi jetike", shpjegoi Mariçiq. ls/

foto: print skrin