Shkup, 1 prill 2024 (MIA) - Prokuror publik kujdestar nga Prokuroria Themelore Publike Shkup ka kryer mbikëqyrje në vendin e ngjarjes dhe ka lëshuar urdhër për mbledhjen e gjurmëve dhe kryerjen e ekspertizave përkatëse, informojnë nga PTHP Shkup në lidhje me të shtënat me armë zjarri drejt kryetarit të Komunës së Haraçinës, Ridvan Ibraimi ku u lënduan dy persona të cilët kanë qenë bashkë me kryetarin e komunës.

Prokuroria shton se do të jepet urdhër për sigurimin e pamjeve nga video incizimet nga objektet përreth, si dhe ndërmarrjen e aktiviteteve të tjera.

Gjatë ditës nga MPB-ja informuan se në SPB Shkup sot është denoncuar se në hyrje të fshatit Haraçinë, një person ka shtënë me pushkë automatike në drejtim të kryetarit të Komunës së Haraçinës Ridvan Ibraimi i cili ka qenë bashkë me disa persona të tjerë. Nga aty kumtuan se kryetari i komunës nuk ka pësuar lëndime, ndërsa siç thanë, nuk janë të sakta as spekulimet e publikuara në disa portale se ka është lënduar ndonjë nëpunës policor.

Ministri teknik për Punë të Brendshme, Pançe Toshkovski për MIA-n madje konfirmoi se në incidentin është qëlluar shoferi i kryetarit të komunës, si dhe është gjuajtur ndaj një personi tjetër të punësuar në komunë.

I lënduari është dërguar në Qendrën urgjente në Shkup.

Drejtori i Klinikës për kirurgji torakale në Qendrën klinike të Shkupit, Nexhati Jakupi për Televizionin Telma ka deklaruar se në Klinikë është sjellë një 30 vjeçar me plagë nga armë zjarri në shpatull.

"Plagët janë për operim urgjent dhe tashmë po hyjmë në sallë", ka thënë Jakupi.

Foto: arkivi i MIA-s