Moskë, 30 qershor 2025 (MIA) - Shpejtësia e negociatave për t'i dhënë fund luftës në Ukrainë varet nga pozicioni i Kievit, efektiviteti i ndërmjetësimit amerikan dhe situata në terren, tha mbrëmë zëdhënësi i Kremlinit, Dmitrij Peskov.

Pesë muaj pasi presidenti i SHBA-së, Donald Tramp, erdhi në pushtet, nuk duket se do të ketë fund për luftën që Rusia filloi në shkurt të vitit 2022 kundër fqinjit të saj më të vogël, pavarësisht faktit se ai premtoi në fushatën e tij të vitit 2024 se do ta përfundonte atë brenda një dite.

Tramp, i cili ka ushtruar presion ndaj të dyja palëve për të negociuar një armëpushim që kur u inaugurua në janar, tha të premten se mendonte se "diçka do të ndodhë" për t'i dhënë fund luftës.

"Shumë varet, sigurisht, nga pozicioni i regjimit në Kiev", tha Peskov për televizionin Bjellorusia-1, kanalin kryesor televiziv shtetëror në vendin që kufizohet me Rusinë.

"Varet se sa efektiv do të jetë ndërmjetësimi i Uashingtonit", tha ai, duke shtuar se situata në terren është një faktor tjetër që nuk mund të injorohet.

Peskov nuk dha detaje të mëtejshme se çfarë pret Moska nga Uashingtoni apo Kievi. Moska ka kërkuar që Ukraina të lëshojë më shumë tokë dhe të ndalojë marrjen e armëve nga Perëndimi, kërkesa që Kievi i quan të papranueshme.

Edhe pse data për negociatat e ardhshme nuk është caktuar ende, Peskov tha se Rusia shpreson që këto data do të bëhen të ditura "në të ardhmen e afërt".

Pas një ndërprerjeje trevjeçare, më 16 maj dhe 2 qershor, Ukraina dhe Rusia zhvilluan bisedime të drejtpërdrejta në Stamboll që çuan në shkëmbime të shumta të të burgosurve dhe kthimin e ushtarëve të vdekur.

Megjithatë, të dy vendet nuk i janë afruar një marrëveshjeje armëpushimi. Draftet e tyre të një traktati paqeje që ndanë më 2 qershor ishin "memorandume krejtësisht kontradiktore", tha të premten presidenti rus Vladimir Putin.

Rusia, e cila tashmë kontrollon gati një të pestën e Ukrainës, vazhdon të bëjë përparime në vend. Në javët e fundit, ajo ka pushtuar pjesë të rajoneve juglindore të Ukrainës, Donjeck dhe Dnjepropetrovsk, dhe ka intensifikuar sulmet ajrore në të gjithë vendin.

Turqia, nikoqire e raundit të fundit të negociatave, është gati të presë përsëri negociatorët nga vendet ndërluftuese. sa/

foto: MIA