Shkup, 1 dhjetor 2025 (MIA) - Eurointegrimet për ne nënkuptojnë përparim, jetë më të mirë, vlera evropiane. Prandaj flasim çdo ditë, pavarësisht se nga cili entitet politik vijmë, në fund të fundit të gjithë kemi një qëllim të përbashkët - përcaktimi i dytë strategjik i këtij vendi duhet të jetë anëtarësimi në Bashkimin Evropian për të cilin duhet të punojmë së bashku, tha sot zëvendësministrja për Çështje evropiane, Viktorija Trajkov, në ngjarjen e sotme të organizuar nga Grupi parlamentar ndërpartiak për monitorimin e implementimit të detyrimeve të Procesit të Berlinit dhe Agjendës reformuese të Planit të rritjes me temën "Agjenda reformuese dhe Procesi i Berlinit përmes prizmit të integrimit evropian: Roli i Parlamentit në zbatimin e prioriteteve rajonale".

Trajkov në fjalimin e saj theksoi se Procesi i Berlinit dhe Agjenda reformuese janë urat për unitet dhe kohezion të vendeve të rajonit të cilat do të na ndihmojnë të bëhemi më të mirë, më konkurrues dhe më të fortë si shtete.

"Por forca vjen nga bashkimi, sepse vetëm me përpjekje të përbashkëta mund të ecim përpara drejt ditëve më të mira për këtë vend", tha Trajkov.

Ajo theksoi se për Qeverinë, një nga prioritetet kryesore është zbatimi konsistent i detyrimeve që rrjedhin nga Procesi i Berlinit dhe Agjenda reformuese "për zbatimin e të cilave jemi zotuar - jo vetëm si detyrim, por edhe si nevojë për të gjithë ne".

"Është një shans për bashkimin tonë rajonal ekonomik, sociologjik dhe kulturor, përmes të cilit do t'i perceptojmë dobësitë tona dhe do t'i shndërrojmë ato në mundësi. Është një shans për t'iu afruar më shpejt BE-së duke zbatuar standardet dhe vlerat evropiane. Konsideroj se potenciali për krijimin e mundësive përmes Procesit të Berlinit dhe Agjendës reformuese është i madh dhe roli i parlamenteve në një kontekst rajonal, por edhe kombëtar është thelbësor për implementimin me sukses të planeve dhe prioriteteve të përcaktuara. Lista e detyrave që na janë dhënë është e gjatë, por kjo nuk duhet të na dekurajojë, por përkundrazi paraqet një sfidë të madhe për të gjithë ne", theksoi Trajkov.

Ajo shtoi se gjatë kësaj periudhe janë të fokusuar në përmbushjen e 29 hapave deri në fund të vitit në fushat e menaxhimit të financave publike, reformës së administratës publike, energjisë, tranzicionit digjital, zhvillimit të sektorit të biznesit dhe reformave në fushën e sundimit të ligjit.

"Në fund të fundit, kjo qeveri po punon për të mirën e qytetarëve, bizneseve dhe shtetit. Dimë dhe mundemi më mirë, por vetëm nëse jemi të gjithë së bashku. BE-ja na mbështet në përpjekjet tona për t'u bërë më të mirë, më të suksesshëm dhe më konkurrues. Prandaj, le të shfrytëzojmë mundësitë dhe të investojmë të gjitha kapacitetet tona. Mendoj se mundemi dhe duhet të jemi së bashku, për të rinjtë tanë dhe për brezat e ardhshëm për ta sjellë Evropën në shtëpi, duke përmbushur të gjitha hapat që kemi përcaktuar në Agjendën reformuese", theksoi Trajkov.

Marko Troshanovski, kryetar i IDSCSh, theksoi në fjalën e tij të hapjes se që nga viti 2019, në samitin në Poznan të Polonisë u arrit në përfundimin se për të rritur ndjenjën e pronësisë së Procesit të Berlinit për përfituesit përfundimtarë, të cilët janë qytetarët e Ballkanit Perëndimor, është e nevojshme të përfshihen parlamentet si përfaqësues të tyre të drejtpërdrejtë.

Disa nga afatet dhe angazhimet e ndërmarra në kuadër të Agjendës reformuese, siç theksoi Troshanovski, për fat të keq janë vonuar në shumë sektorë themelorë dhe vendimtarë.

Kryetari i Grupit parlamentar ndërpartiak për monitorimin e zbatimit të angazhimeve të Procesit të Berlinit dhe Agjendës reformuese, Antonio Miloshoski, theksoi se gjatë diskutimit të sotëm do të bëhet shqyrtim i asaj që është realizuar deri më tani dhe angazhimeve që janë përpara.

Ai theksoi se Parlamenti i Maqedonisë dhe deputetët, veçanërisht ata të përfshirë në këtë grup, do t'i kushtojnë vëmendje më të madhe dhe do të organizojnë më shumë seanca të tilla në të cilat do të diskutohet Agjenda reformuese dhe Procesi i Berlinit si një projekt për integrim më të fortë në BE.

Foto: arkivi i MIA-s