Athinë, 9 maj 2025 (MIA) - Nga e marta deri dje, në afërsi të ishullit të vogël grek Gavdos, që ndodhet në jug të Kretës, në pesë raste të veçanta u zbuluan dhe u shpëtuan 270 migrantë, ndërsa u arrestuan pesë kontrabandistë, njoftoi korrespondentja e MIA-s në Athinë.

Gjatë ditës së djeshmë, në zonën detare 40 milje detare në jug të Gavdos, një varkë me 66 persona kërkoi ndihmë dhe menjëherë ndërhyri një anije e Fronteks-it dhe një anije shpëtimi e Rojës Bregdetare greke, pas së cilës të gjithë u shpëtuan dhe u transferuan të sigurt në portin e ishullit Kretë.

Siç publikoi MIA të martën, në jug të Gavdos, u shpëtuan gjithsej 158 emigrantë, të cilët po transportoheshin me tre anije, ndërsa Roja Bregdetare greke informoi më tej se u arrestuan gjithsej katër persona, të moshës 19 deri në 32 vjeç, të gjithë shtetas të Sudanit, të cilët u identifikuan nga personat e shpëtuar si kontrabandistë dhe supozohej se do t'i transportonin migrantët nga Libia në Greqi për një shumë të caktuar parash.

Një shtetas sudanez u arrestua edhe për një rast tjetër për kontrabandë të emigrantëve, gjithashtu në Gavdos, i cili ishte midis 46 emigrantëve të zbuluar në plazhin e ishullit, të cilët të martën përmes rrugës detare mbërritën nga Libia. 

Gavdos është një ishull i vogël në afërsi të Kretës dhe është pika më jugore e Evropës. ls/