Shkup, 5 maj 2023 (MIA) - Tri investimet e reja të huaja të paralajmëruara nga ZZHTI do të jenë në Shkup, Shkup - Shtip dhe Kërçovë. Me kompanitë janë arritur marrëveshje dhe nënshkrimi me njërën prej tyre është planifikuar deri në fund të majit, njoftoi sot drejtori i Drejtorisë për Zona Zhvillimore Teknologjike Industriale, Jovan Despotovski.

Despotovski informon gjithashtu se kompania e parë e madhe vendase do të bëhet klient i ZZHTI në javët e ardhshme.

"Tri investimet e reja të huaja që paralajmërova se po i përfundojmë janë kompani me të cilat tashmë kemi arritur marrëveshje. Dy nga tre kontratat tashmë janë dorëzuar në Komisionin për Mbrojtjen e Konkurrencës, pra procedura për dhënien e mendimit, dhe nënshkrimi i njërës kontratë tashmë është planifikuar për në fund të majit. Për dy të tjerat do të shohim sipas agjendës se si do të organizojmë ngjarje. Megjithatë, sigurisht që nënshkrimi do të bëhet deri në fund të qershorit. Bëhet fjalë për investime në zonat në Shkup, investim i kombinuar Shkup - Shtip dhe në zonën në Kërçovë. Nga pikëpamja e investimeve vendase, tashmë e kemi paralajmëruar fundin e majit, por për shkak të dinamikës tashmë me investimet e huaja, mund të jetë java e parë e qershorit, por sigurisht i qëndrojmë asaj që është përcaktuar, që Kompania e parë e madhe vendase do të bëhet klienti ynë në javët në vijim", tha drejtori i cili më parë bëri një seksion të realizuar në zona për muajin prill 2023.

Despotovski përkujtoi se tri marrëveshjet e reja plotësojnë një koncept zhvillimor në funksionimin e zonave.

"Nga mesi i vitit po hyjmë në prezantimin e një koncepti zhvillimor krejtësisht të ri, i cili nënkupton mbështetje më të madhe në kompanitë dhe resurset vendore", nënvizoi Despotovski.

Sa i përket zonës në Tetovë dhe fabrikës për vetura elektrike, ai përmendi se është arritur një marrëveshje dhe pret që së shpejti të fillojë ndërtimi.

"Ajo që kemi si informacion në mes të kompanisë dhe një konsorciumi prej tri kompanive vendore të ndërtimit, gjë që më gëzon, sepse mjetet për ndërtim mbeten në shtet dhe kjo është shumë e rëndësishme, prandaj pres që së shpejti të fillojë”, tha Despotovski, duke u përgjigjur në pyetjen e një gazetari. sa/