Shkup, 12 korrik 2023 (MIA) -  Bashkëpunimi ndërmjet Maqedonisë së Veriut dhe Finlandës në kuadër të OSBE-së, me fokus të veçantë në aktivitetet dhe sfidat me të cilat përballet kryesimi si dhe për pjesëmarrjen e përbashkët në kuadër të Treshes së OSBE-së, ishin në fokusin e takimit të ministrit të Punëve të Jashtme dhe kryesuesit të OSBE-së, Bujar Osmani, me homologen e tij finlandeze, ministren e Punëve të Jashtme, Elina Valtonen, në kuadër të Samitit të NATO-s në Vilnius.

Siç bën të ditur MPJ, duke shprehur kënaqësinë e tyre për bashkëpunimin, ministrat shkëmbyen mendime për aktivitetet dhe mënyrat me të cilat realizohen prioritetet e kryesimit aktual me Organizatën, si dhe përgatitjet, aktivitetet dhe mënyrat se si do të funksionojë organizata deri në Finlandë. 

"Osmani fokus të veçantë i kushtoi iniciativës që së fundmi e prezantoi si kryesues i OSBE-së – Themelimin e Qendrës së re të Ohrit për Paqe dhe Ndërmjetësim, si mjet i ri në kuadër të OSBE-së, i cili duhet të forcojë rolin e Organizatës në promovimin e kulturës, dialogut, politikave të pajtimit, kompromisit etj", bëhet e ditur në kumtesë.

Osmani dhe Valtonen, krahas aktiviteteve në OSBE në kuadër të kryesimit të Maqedonisë së Veriut në vitin 2023, kanë biseduar edhe për sfidat që kanë të bëjnë me çështje të tjera të rëndësishme për funksionimin e Organizatës si dhe mbi mënyrat për zgjidhjen e tyre.

Bashkëbiseduesit shprehën kënaqësinë për rolin e deritanishëm të OSBE-së në sigurimin e stabilitetit dhe sigurisë afatgjate në Evropë, duke theksuar se është e nevojshme të bëhen përpjekje shtesë politike që Organizata ta ruajë këtë rol edhe në të ardhmen. fc/

Fotografia: MPJ