Osmani drejtuar Shallenbergut: Përshpejtimi i integrimit në BE do ta rikthejë kredibilitetin e procesit të zgjerimit të Unionit
Shkup, 7 korrik 2023 (MIA)- Kryesuesi i OSBE-së dhe ministri i Punëve të Jashtme, Bujar Osmani në margjinat e Konferencës së parë për ndryshimet klimatike që u mbajt sot në Vjenë, realizoi takim bilateral me ministrin e Punëve të Jashtme të Austrisë, Aleksander Shallenberg.
“Austria ofron mbështetje të fuqishme dhe ka një angazhim të drejtpërdrejtë dhe konstruktiv në ballafaqimin me sfidat dhe në prioritetet e kryesimit të OSBE-së në vitin 2023, me ç'rast Osmani kërkoi ndihmën e Austrisë në trajtimin e çështjeve urgjente të rëndësishme për funksionimin e Organizatës”, njoftojnë nga MPJ.
Në aspektin e bashkëpunimit bilateral ndërmjet Maqedonisë së Veriut dhe Austrisë, dy vendet kultivojnë marrëdhënie të ngushta për gati tre dekada, me përkushtim të ndërsjellë për avancimin e mëtejshëm të bashkëpunimit.
“Maqedonia e Veriut shpreh mirënjohjen e saj ndaj Austrisë për mbështetjen e fortë dhe të hapur në rrugën tonë drejt aderimit në BE dhe përpjekjet e gjithë Ballkanit Perëndimor në BE. Vendi e vlerëson mbështetjen austriake për konceptin e integrimit të përshpejtuar, duke besuar se do të kontribuojë në ruajtjen e kredibilitetit të procesit të zgjerimit”, theksoi Osmani në takimin me Shallenberg.
Ministri e njoftoi bashkëbiseduesin edhe për procesin për ndryshimet kushtetuese, i cili është në rrjedhë e sipër.
“Amendamentet kushtetuese janë në fokus kryesor të Maqedonisë së Veriut. Jemi duke punuar në sinkronizimin e këtij procesi me të gjitha palët e interesuara në vend që të përfundojë me sukses deri në dhjetor të vitit 2023”, ka thënë Osmani.
Sa i përket zhvillimeve rajonale, Osmani e theksoi rolin e Maqedonisë së Veriut si nikoqir i dialogut Beograd- Prishtinë në Ohër, i cili rezultoi me një marrëveshje të rëndësishme. Ai prezantoi edhe planin 9 pikësh të ofruar, si vlerë të shtuar për deeskalimin e situatës në veri të Kosovës.
“Vazhdimi i dialogut të udhëhequr nga BE-ja është jashtëzakonisht i rëndësishëm si për OSBE-në ashtu edhe për Maqedoninë e Veriut si fqinj. OSBE-ja është e gatshme të mbështesë dhe të ndihmojë zbatimin e rekomandimeve që do të dalin nga ky proces në terren”, nënvizoi Osmani.
Foto: MPJ
