Shkup, 15 prill 2025 (MIA) - Në Komisionin e sotëm kuvendor për sistem politik dhe marrëdhënie ndërmjet bashkësive nuk kaloi Nisma e "Frontit Evropian" për mbajtjen e debatit mbikëqyrës për hetimin e tragjedisë në Koçan. Për nismën votuan katër anëtarë të Komisionit të partive politike "Fronti Evropian" dhe LSDM.

Deputetët e Frontit Evropian vlerësuan se duke mos votuar nevojën e mbajtjes së një debati mbikëqyrës, qeveria po ikën nga e vërteta dhe po tregon se nuk është zëri i popullit.

"Është e trishtuar për ata shpirtra të rinj në Koçan dhe unë do t'u shpreh ngushëllimet e mia prindërve dhe familjarëve të tyre. Por, një gjë duhet ta dinë - mosvënia e kësaj nisme në rend dite ku të gjitha institucionet duhet ta zbulojnë të vërtetën dhe duhet të jenë transparente, nuk dëshirojnë të vihet në rend dite, sepse pas kësaj qëndron e vërteta. Këtë nismë nuk e votoni sepse Micko është i përfshirë në mënyrë indirekte në këtë rast, ndërsa Toshkovski dhe bashkëpunëtorët e tij janë përfshirë në mënyrë direkte në rastin në Koçan", tha Sadulla Duraki nga BDI.

Duraki është paralajmëruar disa herë nga kryetari i Komisionit për Sistemin Politik Ljupço Prenxhov se ka kaluar koha e paraparë për një fjalim procedural, për të cilën Duraki është përgjigjur se nuk ka asnjë burrë, qeveri apo parlament që mund t'ia heqë të drejtën e fjalës, e që pasoi një debat të shkurtër mes kryetarit të Komisionit Ljupço Prenxhov dhe deputetit të BDI-së, Blerim Bexheti.

Bexheti thekson se do t'i përdorin të gjitha mjetet që ua mundëson Rregullorja.

"Kërkohet vetëm debat dhe më vjen keq që nuk po votoni për të debatuar për ngjarjen tragjike në Koçan. Si ta kuptojmë këtë? Duhet të debatojmë dhe të shohim nëse ky është një shtet demokratik apo po shkon drejt totalitarizmit të gjerë. Nëse shkon drejt totalitarizmit të gjerë, atëherë fjalën do ta kenë shqiptarët, jo vetëm deputetët", tha Bexheti.

Deputetët e LSDM-së theksuan se nuk është kohë e mbledhjes së pikëve politike dhe se deri tani në Kuvend nuk ka ndodhur të mos jepet mundësi të mbahet debat mbikëqyrës.

"Prokuroria le të vazhdojë punën e saj, por ne si deputetë duhet të themi nëse duam apo nuk duam që e vërteta të dalë në sipërfaqe. Askund në Rregullore nuk thuhet se ju lejohet të refuzoni nismën. Ne duhet ta rishikojmë dhe në fund ta votojmë, dhe nëse nuk dëshironi një seancë mbikëqyrëse, të votoni dhe refuzoni. Por askund nuk thotë se mund të luash kështu", tha Fatmir Bytyqi nga LSDM.

Deputetët e VMRO-DPMNE-së dhe nga "Vlen" theksuan se arsyeja pse nuk kanë votuar nuk do të thotë se janë kundër debatit mbikëqyrës, por janë për përfshirjen e të gjitha tragjedive tjera paraprake si Spitali modular në Tetovë, "Besa Trans"...

"Ne nuk e votuam këtë propozim, jo ​​sepse jemi kundër diskutimit për tragjedinë që ndodhi në Koçan, por kërkojmë që në të njëjtën kohë të debatohen edhe tragjedi të tjera që kanë ndodhur në 4-5 vitet e fundit. Nuk mund ta lëmë pa diskutim për ngjarjet në Spitalin Modular në Tetovë ku humbën jetën 45 persona dhe për aksidentin e autobusit Besa Trans. Nëse sistemi është jofunksional, do të thotë se duhet të ndërhyjmë me të gjitha temat. Precedenti i parë ka ndodhur në mandatin e kaluar. Isha kryetar i Komisionit anketues për të drejtat dhe liritë e qytetarëve, caktova një diskutim me të gjitha materialet, iu drejtova ministrive, institucioneve, sollën raporte me shkrim dhe caktuam seancën e rregullt të Komisionit Anketues për të diskutuar për aksidentet me "Besa Trans"-in dhe Spitalin Modular në Tetovë. Kryetari i Kuvendit pezulloi punën e Komisionit. Pra, për herë të parë në historinë parlamentare të këtij vendi është pezulluar puna e komisionit amë. Nuk ka ndodhur kurrë në histori. Tani po ata që pezulluan një seancë të tillë tani kërkojnë një parim. Nuk ka logjikë. Do të diskutohet, por për të gjitha aksidentet bashkë", tha deputeti i Vlenit, Halil Snopçe.

Deputetët e Lëvizjes ZNAM theksuan se derisa ka hetim aktiv për rastin në Koçan, Kuvendi nuk do të ishte mirë të mbajë debat mbikëqyrës, sepse, siç theksuan, do të ishte si presion dhe përzierje në këtë proces.

"Partia ZNAM beson se të gjitha aksidentet që kanë ndodhur duhet të diskutohen. Mendoj se është krejtësisht e pavend, ndërkohë që ka një hetim aktiv në këtë moment, që Parlamenti të ndërhyjë në këtë mënyrë në punën e organeve të hetimit. Në këtë moment, a nuk do të ishte presion absolut ndaj Prokurorisë dhe drejtësisë dhe ndërhyrje direkte nëse do të zhvillonim një debat të tillë politik ndërkohë që procesi është ende aktiv? Mendoj se duhet të përfundojë procesi dhe më pas të bëjmë mbikëqyrjen. Askush nuk po i shpëton përgjegjësisë, por më duket se reagimet e tilla janë në fakt një mënyrë për t'i ikur përgjegjësisë duke pasur parasysh gjerësinë dhe shtrirjen e hetimeve që janë duke u zhvilluar", tha Boban Karapejovski nga Lëvizja ZNAM.

Nga VMRO-DPMNE theksuan se nuk janë kundër debatit mbikëqyrës, por ai duhet të mbahet pasi të përfundojë hetimi dhe atëherë të bisedohet jo vetëm për Koçanin, por edhe për të gjitha aksidentet tjera.

"Në momentin kur të përfundojë hetimi, do të pajtohemi që të mbajmë seanca mbikëqyrëse për spitalin modular në Tetovë, "Besa Trans"-in, tha deputetja e VMRO-DPMNE-së, Dafina Stojanovska. sa/

Foto: MIA/ Printskrin nga video