Shkup, 28 nëntor 2023 (MIA) - Kuvendi i Republikës së Maqedonisë së Veriut, Fondacioni për demokraci Vestminster dhe Ministria e Punëve të Jashtme dhe Zhvillimit të Komonveltit britanik, sot nënshkruan Memorandum për mirëkuptim me të cilin do të zbatohet projekti "Praktikoje demokracinë", i financuar nga Ambasada britanike në Shkup, ndërsa do të zgjasë së paku deri më 31 mars të vitit 2025.

Memorandumin për mirëkuptim, kumtuan nga shërbimi për shtyp i Kuvendit, e nënshkruan sekretarja e përgjithshme e Kuvendit, Cvetanka Ivanova, drejtori rajonal për Evropë dhe Azinë Qendrore i Fondacionit për Demokraci të Vestminsterit, Kristofer Stuart Levik dhe drejtori i Programeve në Ambasadën Britanike në Shkup, Andru Brand.

Sipas Sekretares së Përgjithshme Ivanova, me nënshkrimin e memorandumit do të vazhdojë bashkëpunimi afatgjatë dhe i suksesshëm me Fondacionin Vestminster, rezultat veçanërisht domethënës i të cilit është themelimi i Zyrës së Buxhetit në Kuvend dhe njëkohësisht bashkëpunimi me Klubin rinor vazhdon, si dhe në pjesën e programit vullnetar.

Përfaqësuesit e Ambasadës Britanike dhe Fondacionit për Demokraci të Vestminster-it besojnë se bashkëpunimi dhe partneriteti me Kuvendin e Republikës së Maqedonisë së Veriut rezulton në faktin se projektet e realizuara u  bënë shembull për interesimin e parlamenteve të tjera në rajon.

"Qëllimi i projektit është t'i ofrojë mbështetje Kuvendit në forcimin e Programit të Punës Vullnetare për të rinjtë, me qëllim të ngritjes së kapaciteteve për kuadër të ri potencial për institucionin. Mbështetje ofrohet edhe për punën e organeve joformale (Klubi për Çështje Rinore dhe Politika Rinore) dhe komisioneve kuvendore (Komisioni për Financim dhe Buxhet), si dhe organeve dhe komisioneve të tjera në përputhje me nevojat e përcaktuara të përbashkëta", citohet në kumtesën e shërbimit për shtyp të Kuvendit. sa/

Foto: Kuvendi i RMV-së