Bruksel, 16 shtator 2025 (MIA) - Të gjithë anëtarët e Bashkimit Evropian kanë arritur në përfundimin se vendi po jep një dinamikë të fuqishme në reformat në pjesën e sundimit të ligjit, deklaroi për MIA-n ministri i Çështjeve Evropiane, Orhan Murtezani pas takimit të sotëm të Këshillit për Çështje të Përgjithshme të BE-së (GAK), në të cilin një nga pikat ishte raporti i Komisionit Evropian mbi sundimin e ligjit në disa nga vendet-kandidate për anëtarësim për vitin 2025.

"Në Raport konstatohen reforma të caktuara që janë zbatuar me sukses, por ka edhe gjëra ku do të duhet të investojmë energji dhe përpjekje shtesë në zbatimin e të gjitha propozimeve dhe rekomandimeve të tyre. Dhe sot në takim përmenda se nuk i shohim ato rekomandime si dobësi, por si udhëzime mbi të cilat duhet të veprojmë dhe t'i zgjidhim sa më shpejt të jetë e mundur", theksoi Murtezani.

Ai përkujtoi se ky është viti i dytë radhazi që vendet kandidate, përfshirë edhe tonat, përfshihen në të ashtuquajturin Mekanizëm për sundimin e Ligjit, i cili më parë ishte menduar ekskluzivisht për vendet anëtare të BE-së.

"Nga mbështetja që e pashë sot nga të gjithë kolegët e mi nga vendet-anëtare, besoj se procesi i integrimit gradual ose i ashtuquajturi proces i fazës së hyrjes do të fitojë dinamikë shtesë, sepse është mënyra e duhur jo vetëm për të monitoruar reformat, por edhe për të mbajtur nën kontroll drejtimin e zbatimit të tyre", përfundoi Murtezani.

Ministri theksoi se fusha të caktuara, siç është Kodi Penal, të cilat duhet të riparohen sa më shpejt që të jetë e mundur, si dhe rekomandimet ose gjetjet mbi pavarësinë e gjyqësorit dhe situatën me mediat, janë pak a shumë të pranishme në raportet për të gjitha vendet kandidate.

Sipas Murtezanit, këto situata ne edhe vetë i kemi detektuar dhe kapërcimi i tyre do të kontribuojë në forcimin e demokracisë në shoqërinë tonë, duke filluar nga përfshirja më e madhe e sektorit joqeveritar jo vetëm si vëzhgues, por edhe si partner në krijimin e politikave, transparencë më e madhe në aspektin e financimit dhe strukturës së pronësisë së medias, pastaj parandalimi i gjuhës së urrejtjes, si dhe pavarësi më e madhe në aspektin e buxhetit të autoriteteve gjyqësore.

"Këto janë disa pika që janë thelbësore për të filluar procesin e rikthimit të besimit të qytetarëve në sistemin gjyqësor", theksoi Murtezani, duke shtuar se megjithëse Qeveria si degë ekzekutive është e ndarë nga dega gjyqësore, ajo prapë thirret të krijojë të gjitha kushtet e nevojshme për zbatimin me sukses të reformave në gjyqësor në frymën e rekomandimeve të Bashkimit Evropian.

Lidhur me Konferencën e sotme të gjashtë ndërqeveritare Shqipëri-BE, në të cilën u hapën katër kapituj të rinj të procesit të negociatave, Murtezani vlerësoi se shpejtësia me të cilën Tirana hap kapitujt dhe së shpejti planifikon të fillojë mbylljen e tyre, nuk duhet të jetë një motiv edhe më i madh për ne që të fillojmë procesin e negociatave të grupeve sa më shpejt të jetë e mundur.

"Momenti është këtu. Nuk duhet ta lëmë këtë moment të humbasë", shtoi Murtezani.

I pyetur se sa realiste janë shanset për pranimin e më shumë anëtarëve të rinj në BE në vitin 2030, Murtezani tha se pas fillimit të pushtimit rus të Ukrainës, duke dëgjuar të gjithë përfaqësuesit e anëtarëve të BE-së dhe duke marrë parasysh vendosmërinë e kryetares së Komisionit Evropian, Ursula fon der Lajen dhe të gjithë liderëve të Bashkimit Evropian, ky është viti kur BE-ja do të këmbëngulë në pranimin e sa më shumë vendeve kandidate.

"Kështu që, kjo kornizë - viti 2030, është shumë e mundur edhe për ne, nëse i hapim shpejt negociatat dhe mund të arrijmë shpejt mbylljen e tyre dhe pastaj do të presim që vendet-anëtare të thonë fjalën e fundit", shtoi Murtezani në një deklaratë për MIA-n nga Brukseli.

Rastësisht, në seancën e sotme të GAK-ut, përveç raportit për vendin, janë shqyrtuar edhe raportet për Shqipërinë, Serbinë dhe Malin e Zi. mb/

Foto: MIA