Shkup, 22 prill 2025 (MIA) - Ministri i Punëve të Jashtme dhe Tregtisë së Jashtme, Timço Mucunski, sot në takime të veçanta priti ushtruesin e detyrës në ambasadën e Katarit në Shkup, Sheik Jasim bin Hamad Al Tani dhe ambasadorin e Republikës së Kazakistanit në Shkup, Satibaldi Burshakov.

Në takimin me ushtruesin e detyrës në ambasadën e Katarit në Shkup, Sheik Jasim bin Hamad Al Tani, u konfirmuan marrëdhëniet tradicionalisht të mira dhe miqësore mes dy vendeve, duke theksuar përkushtimin e përbashkët për dinamizimin e dialogut politik dhe shkëmbimin e vizitave të nivelit të lartë.

Në pjesën e bashkëpunimit dypalësh, bashkëbiseduesit e theksuan nevojën e thellimit të marrëdhënieve ekonomike dhe tregtare, si dhe rritjen e vëllimit të investimeve direkte grinfild dhe braunfild të Katarit në vendin tonë.

Në takimin me ambasadorin e Republikës së Kazakistanit në Shkup, Satibaldi Burshakov, bashkëbiseduesit konstatuan se marrëdhëniet dypalëshe ndërmjet dy vendeve janë të mira, duke theksuar nevojën e thellimit të tyre të mëtejshëm, veçanërisht në sferën ekonomike, si dhe forcimin e bashkëpunimit të përgjithshëm dypalësh në të ardhmen.

Gjithashtu u shpreh kënaqësi e ndërsjellë për bashkëpunimin e shkëlqyer të deritanishëm në nivel shumëpalësh dhe mbështetjen e ndërsjellë të kandidaturave brenda organizatave ndërkombëtare. Ministri Mucunski dhe ambasadori Burshakov shkëmbyen mendime edhe për çështje të tjera aktuale me interes të përbashkët, duke shprehur besimin se bashkëpunimi i mirë mes dy vendeve do të vazhdojë me intensitet të shtuar. ls/

Foto: MPJdheTJ